خیبرپختونخوا:طوفانی بارشوں کے باعث جاں بحق افراد کی تعداد 36 تک جا پہنچی
خیبرپختونخوا میں طوفانی بارشوں کے باعث جاں بحق افراد کی تعداد 36 تک جا پہنچی ہے
خیبرپختونخوا کے مختلف اضلاع میں طوفانی بارشوں کی وجہ سے حادثات کے نتیجے میں اب تک 36 افراد جاں بحق جبکہ اس کے ساتھ ہی46 افراد زخمی ہو چکے ہیں۔صوبائی ڈیزاسٹر منیجمنٹ اتھارٹی (پی ڈی ایم اے) کی طرف سے جاری جانی و مالی نقصانات کی رپورٹ کے مطابق جاں بحق افراد میں 20 بچے، 8 مرد اور 8 خواتین شامل ہیں۔پی ڈی ایم اے کے مطابق زخمیوں میں 9 خواتین، 33 مرد اور 11 بچے شامل ہیں۔
مختلف اضلاع میں رپورٹ کے مطابق دیواریں اور چھتیں گرنے سے مجموعی طور 2391 مکانات کو نقصان پہنچا جس میں 388 گھر مکمل طور پر تباہ ہو گئے ہیں جبکہ 2003 گھروں کو جزوی نقصان پہنچا ہے۔پی ڈی ایم اے کی رپورٹ کے مطابق موسلا دھار بارشوں کے باعث حادثات صوبہ کے اضلاع خیبر، لوئر اور اپر دیر، لوئر اور اپر، سوات، باجوڑ، شانگلہ، مانسہرہ، مہمند، مالاکنڈ، کرک، ٹانک، مردان، پشاور، چارسدہ، نوشہرہ، بونیر، ہنگو، بٹگرام، بنوں، شمالی و جنوبی وزیرستان، کوہاٹ، ڈیرہ اسماعیل خان اور اورکزئی میں رونما ہوئے ہیں۔پی ڈی ایم اے کے مطابق 21 اپریل تک بارشوں کا سلسلہ وقفے وقفے سے جاری رہنے کا امکان ہے جبکہ پہلے سے ہی تمام ضلعی انتظامیہ کو الرٹ رہنے اور پیشگی اقدامات اٹھانے کے لیے مراسلہ جاری کیا جا چکا ہے۔