پشاور (حسن علی شاہ) — خیبر ٹیلی ویژن کا طویل عرصے سے جاری مقبول میوزیکل اور کوئز پر مبنی پروگرام “خیبر شو” کی خصوصی ریکارڈنگ گزشتہ روز نشتر ہال پشاور میں منعقد ہوئی، جس میں شہر پشاور سمیت دیگر علاقوں سے بڑی تعداد میں شائقین نے شرکت کی۔
ہال میں گنجائش سے زیادہ افراد کی آمد کے باعث متعدد شرکاء کو نشستوں کے درمیان موجود خالی جگہوں پر بیٹھنا پڑا، جس سے پروگرام کی مقبولیت اور عوامی دلچسپی کا بخوبی اندازہ لگایا جا سکتا ہے۔
یہ امر بھی قابلِ ذکر ہے کہ ملک کے دیگر نجی چینلز پر کوئز اور فیملی شوز زیادہ تر لاہور اور کراچی میں ریکارڈ کیے جاتے ہیں، تاہم خیبرپختونخوا میں “خیبر شو” واحد ایسا فیملی پروگرام ہے جو صوبے بھر کے ناظرین کی نمائندگی کرتے ہوئے ان کے احساسِ محرومی کو کم کرنے میں اہم کردار ادا کر رہا ہے۔
اب تک نشر ہونے والے مختلف اقساط میں نامور فلمی اداکاروں، پلے بیک گلوکاروں، موسیقاروں اور دیگر شعبہ ہائے زندگی سے تعلق رکھنے والی شخصیات کو مدعو کیا گیا ہے۔ اس کے ساتھ ساتھ نئے ٹیلنٹ کو بھی متعارف کروا کر ان کی حوصلہ افزائی کی جاتی رہی ہے۔
جمشید علی خان (پرائیڈ آف پرفارمنس) اس پروگرام کی میزبانی کے فرائض انجام دے رہے ہیں جبکہ فیمید خان اس گرینڈ شو کے پروڈیوسر ہیں۔ پروگرام میں شرکاء کو آسان سوالات کے درست جوابات پر قیمتی انعامات بھی دیے جاتے ہیں۔
مجموعی طور پر “خیبر شو” ایک بھرپور فیملی انٹرٹینمنٹ پروگرام ہے جسے نہ صرف خیبرپختونخوا بلکہ ملک بھر میں شوق سے دیکھا جاتا ہے۔
