پشاور (خصوصی رپورٹر) — خیبر ٹیلی ویژن نیٹ ورک میں جہاں ٹیکنیکل، انتظامی، پروڈکشن، پلاننگ، سیٹ ڈیزائن، میک اپ آرٹسٹ اور نیوز اینکرز اپنی پیشہ ورانہ صلاحیتوں کے ساتھ خدمات انجام دے رہے ہیں، وہیں اسکرین پر جلوہ گر ہونے والے فنکار بھی ناظرین کے دلوں پر گہرا اثر چھوڑ چکے ہیں۔
خیبر ٹیلی ویژن نیٹ ورک کے ابتدائی اور نمایاں فنکاروں میں عارف محمود قاضی کا شمار ہوتا ہے جنہوں نے گزشتہ 21 سالوں کے دوران اپنی خداداد صلاحیتوں کی بدولت خود کو ایک ورسٹائل فنکار کے طور پر منوایا ہے۔
انہوں نے پروڈکشن، ڈائریکشن، اینکرنگ، اداکاری، گلوکاری، ڈرامہ رائٹنگ، پروگرام ڈائریکشن، ایڈیٹنگ اور مارکیٹنگ جیسے مختلف شعبوں میں اپنی صلاحیتوں کا لوہا منوایا ہے۔
عارف محمود قاضی نہ صرف پشتو بلکہ اردو، ہندکو اور پوٹھواری زبانوں پر بھی عبور رکھتے ہیں، جو انہیں ایک منفرد اور ہمہ جہت فنکار بناتا ہے۔
ان کی فنی خدمات اور پیشہ ورانہ مہارت کی وجہ سے وہ خیبر ٹیلی ویژن فیملی کا ایک قیمتی سرمایہ تصور کیے جاتے ہیں، جبکہ ان جیسے باصلاحیت افراد ادارے کی پہچان اور کامیابی میں اہم کردار ادا کر رہے ہیں۔
