کے پی حکومت نے کرغزستان میں پھنسے پاکستانی طلبہ کے لئےمفت پروازیں بھیجنے کا فیصلہ کیا ہے۔
آج سے کے پی حکومت کی جانب سے کرغزستان میں پھنسے ہوئے پاکستانی طلبہ کو صیح سلامت وطن واپس لانے کے لیے مفت خصوصی پروازیں بھیجنے کا فیصلہ کیا گیا ہے۔وزیراعلیٰ خیبرپختونخوا علی امین گنڈاپور کے مطابق بشکیک میں پھنسا ہوا پاکستان کا کوئی بھی شہری 03433333049 اور 03440955550 پر پاکستان سے رابطہ کرسکتا ہے۔ علی امین گنڈا پور کے مطابق کوئی بھی طالب علم مفت ائیر سروس سب سے پہلے آئیے اور پہلے پائیے کی بنیاد پر حاصل کر سکتا ہے جبکہ اس کے ساتھ ہی پاکستانیوں کے گھر والے معلومات کے لیے ٹال فری نمبر 1700 پر رابطہ کرسکتے ہیں۔
یاد رہے کہ 13 مئی کو کرغزستان کے دارالحکومت بشکیک میں بودیونی کے ہاسٹل میں مقامی اور غیرملکی طلبہ کے درمیان لڑائی ہوئی تھی،جھگڑے میں شامل 3 غیرملکیوں کو حراست میں لیا گیا تھا۔کرغز میڈیا کے مطابق 17مئی کی شام چوئی کرمنجان دتکا کے علاقے میں مقامیوں نے بھرپور احتجاج کیا، مقامی افراد نے جھگڑے میں شامل غیرملکیوں کے خلاف کارروائی کا مطالبہ کیا، بشکیک سٹی داخلی امور ڈائرکٹریٹ کے سربراہ نے مظاہرے کو ختم کرنے کی درخواست کی۔
مقامی میڈیا کے مطابق حراست میں لیے گئے تمام غیرملکیوں نے بعد میں معافی بھی مانگی تھی لیکن اس کے برعکس مظاہرین نے منتشر ہونے سے انکار کر دیا اور اس طرح وہ مزید تعداد میں جمع ہوگئے، پبلک آرڈر کی خلاف ورزی پر متعدد افراد کو حراست میں بھی لیا گیا۔کرغز میڈیا کے مطابق وفاقی پولیس کے سربراہ سے مذاکرات اور بات چیت کے بعد مظاہرین منتشر ہوگئے تھے۔
