پروونشل ڈیزاسٹر مینجمنٹ اتھارٹی (پی ڈی ایم اے) خیبرپختونخوا نے صوبے میں بارشوں کے حوالے سے الرٹ جاری کر دیا ہے۔ پی ڈی ایم اے کے مطابق 17 سے 21 اگست تک خیبرپختونخوا کے مختلف اضلاع میں بارش، تیز ہواؤں اور گرج چمک کا امکان ہے۔
پی ڈی ایم اے نے خبردار کیا ہے کہ بارشوں کے دوران بعض علاقوں میں اربن فلڈنگ، سیلاب اور لینڈ سلائیڈنگ کا خطرہ موجود ہے۔
بالائی اضلاع میں بارش کا امکان
پی ڈی ایم اے کے مطابق بالائی اضلاع چترال، دیر، سوات، شانگلہ، بونیر، ملاکنڈ، باجوڑ اور کوہستان میں بارش اور گرج چمک متوقع ہے۔
میدانی علاقوں میں پشاور، مردان، صوابی، چارسدہ، نوشہرہ، کوہاٹ، کرم اور ہنگو میں بھی بارش اور گرج چمک کا امکان ظاہر کیا گیا ہے۔
مردان اور صوابی میں اربن فلڈنگ کا خدشہ
پی ڈی ایم اے کے مطابق مردان اور صوابی کے نشیبی علاقوں میں اربن فلڈنگ کا خطرہ موجود ہے۔ بالائی اضلاع کے پہاڑی علاقوں میں بارش کے باعث لینڈ سلائیڈنگ کا خدشہ بھی ظاہر کیا گیا ہے۔
تیز ہواؤں اور گرج چمک کے دوران کمزور عمارتوں، بجلی کے کھمبوں، بل بورڈز اور سولر پینلز کو نقصان پہنچنے کا بھی امکان ہے۔
ضلعی انتظامیہ کو پیشگی اقدامات کی ہدایت
پی ڈی ایم اے نے تمام ضلعی انتظامیہ کو حساس علاقوں میں پیشگی حفاظتی اقدامات یقینی بنانے کی ہدایت کی ہے۔ دریاؤں، ندی نالوں اور برساتی نالوں کی مسلسل نگرانی کرنے کے ساتھ ساتھ ممکنہ اربن فلڈنگ اور لینڈ سلائیڈنگ سے نمٹنے کے لیے ریسکیو عملے اور ضروری سامان کو تیار رکھنے کی ہدایت بھی کی گئی ہے۔
شہریوں اور سیاحوں کو احتیاط کی ہدایت
پی ڈی ایم اے نے شہریوں کو بارش کے دوران دریاؤں، ندی نالوں اور پانی کی گزرگاہوں سے محفوظ فاصلہ رکھنے کی ہدایت کی ہے۔ والدین سے کہا گیا ہے کہ وہ بچوں کو ندی نالوں، جوہڑوں اور برساتی گزرگاہوں کے قریب جانے سے روکیں۔
گرج چمک کے دوران شہریوں کو بجلی کے کھلے تاروں اور برقی آلات سے دور رہنے کی بھی ہدایت کی گئی ہے۔
پی ڈی ایم اے نے سیاحوں کو غیر ضروری سفر سے گریز کرنے کا مشورہ دیا ہے۔ خاص طور پر پہاڑی علاقوں میں لینڈ سلائیڈنگ کے ممکنہ خطرے کے پیش نظر سیاحوں کو محتاط رہنے کی ہدایت کی گئی ہے۔
