بلوچستان کے مختلف علاقوں میں سیکیورٹی فورسز کے انٹیلی جنس بیسڈ آپریشنز کے دوران 9 دہشتگرد ہلاک ہوگئے، جبکہ دہشتگردوں کے متعدد ٹھکانے بھی تباہ کردیئے گئے۔
سیکیورٹی ذرائع کے مطابق فورسز نے زیارت اور ہرنائی کے پہاڑی علاقوں میں انٹیلی جنس معلومات کی بنیاد پر کارروائیاں کیں۔ آپریشن کے دوران دہشتگردوں کے ٹھکانوں کو مؤثر انداز میں نشانہ بنایا گیا، جس کے نتیجے میں متعدد دہشتگرد ہلاک ہوئے۔
ذرائع کے مطابق سوراب کے مختلف علاقوں میں بھی کارروائی کی گئی، جہاں ایک دہشتگرد مارا گیا۔ مجموعی طور پر ہرنائی، زیارت اور سوراب میں کارروائیوں کے دوران 9 سے زائد دہشتگردوں کی ہلاکت کی اطلاعات ہیں۔
سیکیورٹی ذرائع کا کہنا ہے کہ ہلاک دہشتگردوں کے قبضے سے ایمونیشن، دستی بم اور دیگر جنگی سامان برآمد کیا گیا۔ فورسز نے دہشتگردوں کے متعدد ٹھکانے بھی تباہ کردیئے ہیں۔
علاقے میں ممکنہ خطرات کے خاتمے کے لیے کلیئرنس آپریشن جاری ہے، جبکہ سیکیورٹی فورسز کی جانب سے مزید کارروائیاں بھی کی جا رہی ہیں۔
دوسری جانب گزشتہ روز بلوچستان کے علاقے کلی زائیک میں بھی سیکیورٹی فورسز نے کارروائی کی تھی، جس کے دوران 2 دہشتگرد ہلاک اور 3 زخمی ہوئے تھے۔ ہلاک دہشتگردوں میں سے ایک کی شناخت مشتاق احمد عرف کوہ یار کے نام سے ہوئی تھی۔
سیکیورٹی ذرائع کے مطابق کارروائی کے دوران ہلاک دہشتگرد کے قبضے سے ایمونیشن، میگزین، دستی بم اور دھماکا خیز مواد بھی برآمد کیا گیا تھا۔
