پاکستان کے مختلف دینی مدارس کے فیکلٹی ممبرز اور طلباء نے پاکستان آرمی اسکول آف فزیکل ٹریننگ سینٹر اور پاکستان ملٹری اکیڈمی (پی ایم اے) کاکول، ایبٹ آباد کا دورہ کیا۔ اس دورے کا مقصد دینی طلباء کو پاک فوج کی تربیتی نظام، نظم و ضبط، اور کیڈٹس کی عملی زندگی سے روشناس کرانا تھا۔
دورے کے دوران طلباء کو مختلف تربیتی سرگرمیوں کا مشاہدہ کروایا گیا اور پاکستان ملٹری اکیڈمی کے ماحول اور نظم و ضبط سے آگاہ کیا گیا۔ شرکاء نے پاک فوج کی پیشہ ورانہ مہارت اور تربیت کے اعلیٰ معیار کو سراہا۔
طالب علم حمزہ ارشد نے اپنے خیالات کا اظہار کرتے ہوئے کہا، فوج کی ٹریننگ دیکھ کر بہت حوصلہ ملا، ٹرینیز کی پیشہ ورانہ صلاحیتیں متاثر کن تھیں، ہم آئی ایس پی آر اور پاک فوج کے شکر گزار ہیں کہ ہمیں یہ سب قریب سے دیکھنے کا موقع دیا۔
طلباء نے کہا کہ تقریباً بیس سال پہلے انہوں نے جامعتہ الرشید کے رئیس سے پاک فوج کی اہمیت اور کردار کے بارے میں سننا شروع کیا تھا، اور آج کا دورہ ان نظریاتی باتوں کا عملی مشاہدہ تھا۔
فیکلٹی ممبر سفیان علی نے بھی اپنے خیالات کا اظہار کرتے ہوئے کہا،آج پاکستان ملٹری اکیڈمی کاکول میں ہم نے رئیس کی باتوں کی عملی تفسیر اپنی آنکھوں سے دیکھی۔
