بلوچستان کے ضلع ہرنائی کے سانگ ایریا میں سیکیورٹی فورسز نے ایک کامیاب انٹیلیجنس بیسڈ آپریشن کے دوران کالعدم تنظیم بلوچ لبریشن آرمی (بی ایل اے) کے خطرناک کمانڈر عمر مری عرف دکاشی کو ہلاک کر دیا ۔
عمر مری، جو بی ایل اے کی مجید بریگیڈ کا سرگرم رکن اور کمانڈر تھا، متعدد دہشتگرد کارروائیوں کا مرکزی منصوبہ ساز تھا ۔
عمر مری خاص طور پر کوئلہ سے لوڈ ٹرکوں پر حملوں، انہیں نذرِ آتش کرنے اور سیکیورٹی فورسز کو نشانہ بنانے جیسے سنگین جرائم میں طویل عرصے سے مطلوب تھا ۔
نومبر 2024 میں زیارت ضلع میں ہونے والا حملہ، جس میں کوئلہ لے جانے والے ٹرکوں پر فائرنگ کی گئی اور تین گاڑیوں کو آگ لگا دی گئی، ہلاک دہشتگرد عمر مری گروہ کی کارستانی تھی ۔
اس واقعے میں ہرنائی کے ایس ایس پی کی گاڑی کو بھی نشانہ بنایا گیا تھا اور ان کے سیکیورٹی گارڈ شدید زخمی ہوئے تھے ۔
عمر مری کی ہلاکت نہ صرف بی ایل اے کے دہشتگرد نیٹ ورک کے لیے بڑا دھچکا ہے بلکہ بلوچستان میں امن و امان کے قیام کی جانب ایک اور فیصلہ کن قدم بھی ہے ۔
