ضلع ملاکنڈ میں پولیس، لیویز، سی ٹی ڈی اور ضلعی انتظامیہ کے ہمراہ سیکیورٹی فورسز نے مشترکہ آپریشن میں 9 دہشتگردوں کو ہلاک اور 8 کو گرفتار کرلیا، علاقے کے مقامی لوگوں نے اس آپریشن کو سراہا اور ریاست کی انسداد دہشت گردی کی کوششوں کی مکمل حمایت کا اظہار کیا ۔
پاک فوج کے ترجمان ادارے آئی ایس پی آر کی جانب سے جاری بیان کے مطابق ملاکنڈ میں 16 سے 20 جولائی تک سیکیورٹی فورسز نے پولیس، لیویز، سی ٹی ڈی اور ضلعی انتظامیہ کے ساتھ مل کر خفیہ اطلاعات کی بنیاد پر مشترکہ آپریشن کیا ۔
آئی ایس پی آر کا کہنا ہے کہ آپریشن کے دوران بھارتی حمایت یافتہ 9 دہشتگرد ہلاک جبکہ 8 کو گرفتار کرلیا گیا ، ہلاک اور گرفتار دہشتگردوں کے قبضے سے بھاری اسلحہ او گولہ بارود بھی برآمد کیا گیا ۔
آئی ایس پی آر کے مطابق چار روز تک جاری رہنے والے اس آپریشن کے دوران سیکیورٹی فورسز نے مہارت سے دہشت گردوں کے ٹھکانے کو گھیرے میں لے کر مؤثر طریقے سے نشانہ بنایا اور شدید فائرنگ کے تبادلے میں دہشتگردوں کو ہلاک کیا گیا ۔
آئی ایس پی آر کا مزید کہنا ہے کہ علاقے کے مقامی لوگوں نے اس آپریشن کو سراہا اور ریاست کی انسداد دہشت گردی کی کوششوں کی مکمل حمایت کا اظہار کیا ۔
علاقے میں مزید دہشتگردوں کی موجودگی کے خاتمے کے لیے کلیئرنس آپریشن جاری ہے، پاکستان کی سیکیورٹی فورسز اور قانون نافذ کرنے والے ادارے قوم کے ساتھ مل کر بھارتی سرپرستی میں ہونے والی دہشت گردی کے ناسور کو ملک سے ختم کرنے کے لیے پرعزم ہیں ۔
دوسری جانب وزیراعظم شہباز شریف نے ملاکنڈ میں کامیاب آپریشن پر فورسز کو خراج تحسین پیش کیا ہے اور خوارج دہشت گردوں کی ہلاکت پر فورسز کی ستائش کی ہے ۔
وزیراعظم شہباز شریف نے کہا ہے کہ دہشت گردوں کے خلاف کامیاب کارروائی سیکیورٹی فورسز میں ہم آہنگی کی مثال ہے ۔
انہوں نےکہا کہ دہشت گردی کے خلاف پوری قوم سیکیورٹی فورسز کےساتھ کھڑی ہے، ملک سے ہر قسم کی دہشت گردی کے خاتمے کیلئے پرعزم ہیں ۔
