مردان کی کاٹلنگ کے پہاڑی علاقے بابوزی میںخفیہ اطلاع پر کامیاب کارروائی کے دوران فائرنگ کے تبادلے میں 2دہشت گرد ہلاک ہو گئے، جبکہ دیگر دہشت گرد رات کی تاریکی کا فائدہ اٹھاتے ہوئے فرار ہوگئے، سی ٹی ڈی کے مطابق ہلاک دہشتگردوں کے قبضے سے اسلحہ بھی برآمد ہوا ہے ۔
کاٹلنگ: سی ٹی ڈی کے مطابق مصدقہ اطلاعات موصول ہوئی تھیں کہ فتنہ الخوارج سے منسلک دہشت گردوں کا گروہ کاٹلنگ کے پہاڑی سلسلے میں موجود ہے اور پہاڑ سے نیچے آکر دہشت گردی کی کارروائی کی منصوبہ بندی کر رہا ہے ۔
سی ٹی ڈی مردان ریجن نے بابوزی کے پہاڑی علاقے میں کارروائی شروع کی،اہلکاروں کے موقع پر پہنچنے پر دہشت گرد پہاڑ کی جانب فرار ہوتے ہوئے فائرنگ کرنے لگے، جس پر سی ٹی ڈی اہلکاروں نے موثر جوابی کارروائی کی ۔
اعلامیے کے مطابق فائرنگ کے تبادلے کے بعد سرچ آپریشن کے دوران 2دہشت گرد ہلاک ہوگئے، ہلاک دہشت گردوں کے قبضے سے 2 ایس ایم جیز، ایک ہینڈ گرینیڈ، 6 میگزین اور متعدد کارتوس برآمد ہوئے ۔
سی ٹی ڈی کے مطابق ہلاک دہشت گردوں کی شناخت کا عمل جاری ہے، جبکہ فرار ہونے والے دہشت گردوں کی گرفتاری کے لیے مزید نفری موقع پر پہنچ گئی ہے اور علاقے میں سرچ آپریشن جاری ہے ۔
