پشاور (خصوصی رپورٹر) — معروف اینکر، اداکارہ اور خودمختار ساوی کی جی ایم مینہ شمس نے کہا ہے کہ فن کی حوصلہ افزائی تو کی جاتی ہے، مگر فنکار کی اصل اہمیت کو دل سے تسلیم نہیں کیا جاتا۔
یہ بات انہوں نے خیبر شو کے دوران اداکار و پروڈیوسر حمید اللہ سے گفتگو کرتے ہوئے کہی۔ ان کے مطابق معاشرے میں تخلیقی کام کو سراہا جاتا ہے، لیکن اس کے پیچھے محنت کرنے والے فنکار کو وہ مقام اور احترام نہیں ملتا جس کا وہ حقیقی طور پر مستحق ہوتا ہے۔
اس موقع پر پروڈیوسر حمید اللہ نے بھی مینہ شمس کی بات سے اتفاق کرتے ہوئے اپنے تجربات اور یادگار واقعات بیان کیے۔ انہوں نے کہا کہ وہ خیبر ٹیلی ویژن کے ابتدائی پرائیویٹ ڈائریکٹرز اور پروڈیوسرز میں شامل رہے ہیں، جس پر انہیں فخر ہے۔
حمید اللہ نے مزید بتایا کہ انہوں نے بطور اداکار بھی متعدد ڈراموں میں اہم کردار ادا کیے اور نامور فنکاروں کے ساتھ مشکل کرداروں میں اپنی صلاحیتوں کا لوہا منوایا۔
