آئی ایس پی آر کی جانب سے جاری اعلامیے کے مطابق آرمی چیف جنرل عاصم منیر سے ملائیشین وزیر اعظم داتو سری انور ابراہیم نے ملاقات کی ،اس دوران دوطرفہ سٹریٹیجک انٹرسٹ، علاقائی سلامتی اور دفاعی تعاون پر تبادلہ خیال کیا گیا ،اس موقع پر پاکستان، ملائشیا دوطرفہ تعلقات بالخصوص فوجی تعلقات بڑھانے کی ضرورت پر زوردیا گیا۔
آئی ایس پی آر نے کہا کہ ملائیشیا کے وزیر اعظم نے علاقائی امن و استحکام میں افواج پاکستان کے کردار اور دہشتگردی سےجنگ میں بھی پاکستانی فوج کی پیشہ ورانہ مہارت کو سراہا اور دہشتگردی کے خلاف جنگ میں پاک فوج کی قربانیوں کا اعتراف کیا۔
آئی ایس پی آر کے مطابق اس موقع پر ملائیشین وزیراعظم داتو سری انورابراہیم نے آرمی چیف کو ملائیشیا کے دورے کی دعوت بھی دی جس پر آرمی چیف نے ان کا شکریہ ادا کیا ، ملاقات میں اس بات کا اظہار کیا گیا کہ دورے سے دونوں ممالک اور فوج کے درمیان پائیدار اور تاریخی تعلقات کو مزید بہتر بنانے میں مدد ملے گی۔
آئی ایس پی آر کے مطابق آرمی چیف نے ایوان صدر میں ملائیشیا کے وزیر اعظم کے اعزاز میں منعقدہ تقریب میں بھی شرکت کی۔
