اسلام آباد: وفاقی وزیر داخلہ محسن نقوی سے گورنر خیبرپختونخوا فیصل کریم کنڈی نے ملاقات کی.
ملاقات میں صوبے میں امن و امان کی صورتحال اور دیگر اہم امور پر تفصیلی تبادلہ خیال کیا گیا۔
ملاقات کے دوران خیبرپختونخوا میں انسدادِ دہشتگردی کے لیے کیے گئے اقدامات کا جائزہ لیا گیا۔
گورنر خیبرپختونخوا نے وفاقی وزیر داخلہ کو صوبے کو درپیش سکیورٹی چیلنجز سے آگاہ کیا۔
وزیر داخلہ محسن نقوی اور گورنر فیصل کریم کنڈی نے فتنہ الہندوستان سے وابستہ دہشتگردوں کے خلاف کامیاب انٹیلیجنس بیسڈ آپریشنز پر سکیورٹی فورسز کو خراج تحسین پیش کیا۔
دونوں رہنماؤں نے دہشتگردی کے خلاف جنگ میں جانوں کا نذرانہ پیش کرنے والے شہداء کو بھی زبردست خراج عقیدت پیش کیا۔
اس موقع پر محسن نقوی نے کہا کہ خیبرپختونخوا میں قیام امن کے لیے سکیورٹی فورسز کی قربانیاں ناقابل فراموش ہیں اور پوری قوم ان کی خدمات کو قدر کی نگاہ سے دیکھتی ہے۔
وفاقی وزیر داخلہ نے خیبرپختونخوا میں امن و استحکام کے قیام کے لیے ہر ممکن تعاون کی یقین دہانی کراتے ہوئے کہا کہ وفاقی حکومت صوبے میں امن کے قیام کے لیے خیبرپختونخوا حکومت کے ساتھ مکمل تعاون جاری رکھے ہوئے ہے۔
