ملک بھر میں شدید مون سون بارشوں اور سیلابی پانی کی تباہ کاریاں جاری ہیں، حالیہ مون سون بارشوں کے دوران جانی و مالی نقصانات سے متعلق نیشنل ڈیزاسٹر مینجمنٹ اتھارٹی نے رپورٹ جاری کر دی ۔
اسلام آباد: این ڈی ایم اے کی جانب سے جاری رپورٹ کے مطابق مون سون بارشوں کے باعث 26 جون سے 17 جولائی کے درمیان 178 افراد جاں بحق ہوئے،اس دوران مختلف حادثات میں 491 افراد زخمی بھی ہوئے، جاں بحق افراد میں 85 بچے بھی شامل ہیں ۔
اعداد و شمار کے مطابق پنجاب میں سب سے زیادہ 103 افراد جاں بحق جبکہ 385 افراد زخمی ہوئے ہیں، اس میں 50 بچے بھی شامل ہیں ۔
رپورٹ کے مطابق حالیہ مون سون بارشوں کے دوران خیبرپختونخوا میں 38 افراد جاں بحق اور 57 زخمی ہوئے ، سندھ میں 20 افراد جاں بحق، 40 زخمی ہوئے، بلوچستان میں 16 اموات، زخمیوں کی تعداد 4 ہے، آزاد کشمیر میں 1 شخص جاں بحق ہوا ۔
رپورٹ میں کہا گیا ہے کہ گزشتہ 24 گھنٹے کے دوران 54 افراد جاں بحق ہوئے جن میں 22 بچے شامل ہیں، تمام 54 افراد پنجاب میں مختفل حادثات کے دوران جاں بحق ہوئے ، اس دوران پنجاب بھر میں 227 زخمی بھی ہوئے ۔
این ڈی ایم اے کے مطابق ملک بھر میں گزشتہ 24 گھنٹے کے دوران 88 گھروں کو نقصان پہنچا، مجموعی طور پر اب تک 610 گھروں کو نقصان پہنچا، 126 مویشی پانی میں بہہ گئے ۔
