اسلام آباد، خیبرپختونخوا، شمالی و جنوبی بلوچستان، کشمیر اور گلگت بلتستان کے مختلف علاقوں میں مون سون بارشوں کا سلسلہ جاری ہے، جس کے باعث گرمی کی شدت میں نمایاں کمی آ گئی ہے۔
خیبرپختونخوا کے ملاکنڈ اور ہزارہ ڈویژن میں گزشتہ رات بارش ہوئی، جبکہ مردان، صوابی اور قبائلی اضلاع میں بھی بارش ریکارڈ کی گئی، جس سے موسم خوشگوار ہوگیا۔ اسلام آباد، راولپنڈی، مری اور خطۂ پوٹھوہار کے مختلف علاقوں میں وقفے وقفے سے بارش کا سلسلہ جاری ہے۔
شمالی و جنوبی بلوچستان، کشمیر اور گلگت بلتستان میں بھی مختلف مقامات پر بارش ہو رہی ہے۔ محکمہ موسمیات نے کل بھی متعدد علاقوں میں مزید بارشوں کی پیشگوئی کی ہے۔
دوسری جانب پی ڈی ایم اے نے بالائی علاقوں میں لینڈ سلائیڈنگ اور دیگر ممکنہ حادثات کے پیش نظر متعلقہ اداروں کو الرٹ رہنے اور پیشگی حفاظتی اقدامات یقینی بنانے کی ہدایت جاری کر دی ہے۔
