موٹروے پولیس نارتھ ریجن کا عید مسافروں کے لیے بڑا ریلیف، اوورلوڈنگ اور اوورچارجنگ کے خلاف بھرپور کریک ڈاؤن، چار دنوں میں 16 لاکھ سے زائد رقم واپس کرلی ۔
عید الاضحیٰ کے قریب مسافروں کی سہولت، حفاظت اور مالی تحفظ کو یقینی بنانے کے لیے نیشنل ہائی ویز اینڈ موٹروے پولیس نارتھ ریجن نے اوورلوڈنگ اور اوورچارجنگ کے خلاف ایک منظم اور تیز رفتار مہم شروع کر دی ہے ۔
ایڈیشنل آئی جی نارتھ ریجن نے تمام فیلڈ افسران کو سخت ہدایات جاری کرتے ہوئے کہا ہے کہ موقع پرست ٹرانسپورٹرز اور گاڑی مالکان کے خلاف فوری اور سخت ترین کریک ڈاؤن کیا جائے۔ انہوں نے کہا ہے کہ عید کے ایام میں مسافروں کو کوئی بھی تکلیف برداشت نہیں کی جائے گی اور ایسے عناصر کو قانون کے مطابق سزا دی جائے گی ۔
محض چار دنوں کے دوران موٹروے پولیس نے 1915 مسافر گاڑیوں کو اوورلوڈنگ پر چالان کر دیا جبکہ 892 گاڑیوں پر زائد کرایہ وصول کرنے کے جرمانے عائد کیے گئے۔ ان کارروائیوں کے نتیجے میں مسافروں کو اضافی کرائے کی مد میں سولہ لاکھ سے زائد رقم براہ راست واپس دلائی گئی ۔
زائد پیسے فوری طور پر متاثرہ مسافروں کے حوالے کیے جا رہے ہیں تاکہ عید کے لیے گھر جانے والے افراد کو کسی قسم کا مالی نقصان نہ اٹھانا پڑے ۔
پولیس کی ٹیمیں موٹروے کے تمام اہم انٹری اور ایگزٹ پوائنٹس، ریسٹ ایریاز اور ٹول پلازوں پر مسلسل چوکس ہیں، اوورلوڈ گاڑیوں کو روک کر مسافروں کو مناسب اور محفوظ گاڑیوں میں منتقل کیا جا رہا ہے جبکہ زائد کرایہ لینے والے ڈرائیورز اور مالکان کے خلاف ایف آئی آرز بھی درج کی جا رہی ہیں ۔
متعدد مسافروں نے بڑی خوشی کا اظہار کرتے ہوئے کہا کہ اس مرتبہ پہلی بار اُنہیں زائد کرایہ واپس مل رہا ہے، جس سے اُنکے عید کے اخراجات میں بچت ہوئی ہے ۔
ترجمان موٹروے پولیس نارتھ ریجن نے میڈیا سے گفتگو کرتے ہوئے کہا کہ مسافروں کا تحفظ، ان کی سہولت اور منصفانہ سفر موٹروے پولیس کی پہلی ترجیح ہ، عید کے دنوں میں یہ مہم جاری رہے گی اور تمام مسافروں سے اپیل ہے کہ اگر کوئی ڈرائیور زائد کرایہ مانگے یا اوورلوڈنگ کرے تو فوری طور پر متعلقہ ہیلپ لائن پر رابطہ کریں ۔
موٹروے پولیس کی اس مؤثر اور شفاف کارروائی سے نہ صرف مسافروں کو بروقت ریلیف ملا ہے بلکہ ٹرانسپورٹ سیکٹر میں نظم و ضبط بھی بحال ہو رہا ہے ۔
