پشاور: پاکستان سپر لیگ کی مقبول ترین ٹیم پشاور زلمی نے اپنے فینز کو چاند رات پر آفیشل ریجنل اینتھم 2026 “زمونگ زلمی” کا دلکش ٹیزر جاری کر دیا جس سے شائقین میں جوش و خروش کی لہر دوڑ گئی ۔
پشاور زلمی کی جانب سے جاری ٹیزر میں خیبر پختونخوا کی رنگین ثقافت، پہاڑوں کی شان، پختون فخر اور لازوال اتحاد کی ایک جھلک پیش کی گئی ہے ۔
ٹیزر میں روایتی موسیقی، مقامی رقص اور جذباتی وژولز کے ساتھ یہ ٹیزر محض چند سیکنڈز میں ہی فینز کے دلوں کو چھو گیا۔ سوشل میڈیا پر ٹیزر کے فوراً بعد ہیش ٹیگ #ZamongZalmi ٹرینڈ کرنا شروع ہو گیا اور ہزاروں فینز نے اسے شیئر کرتے ہوئے لکھا کہ “یہ تو صرف ٹیزر ہے، مکمل گانا سن کر تو دل جیت لے گا ۔
اس اینتھم میں مشہور گروپس “خماریان” اور “جام بوائز” کی دلکش اور پرجوش آوازوں کا حسین امتزاج شامل ہے،اینتھم کے بول ہمایوں نے تحریر کیے ہیں جبکہ احسن نے اسے ڈائریکٹ کیا ہے ۔
پشاور زلمی کا یہ ریجنل اینتھم خطے کی شناخت، نوجوانوں کے جذبے اور زلمی فینز کی بے پناہ محبت کی بھرپور نمائندگی کرے گا ۔
ٹیم کے ذرائع کے مطابق “زمونگ زلمی” کا مکمل آفیشل ورژن رات دیر گئے جاری کیا جائے گا، فینز اب تک اس کی ریلیز کا بے صبری سے انتظار کر رہے ہیں، پشاور زلمی انتظامیہ نے کہا کہ یہ اینتھم صرف ایک نغمہ نہیں، بلکہ ہمارے خطے کی آواز، ہمارے فینز کا جذبہ اور زلمی خاندان کا اتحاد ہے ۔
عید کے اس مبارک موقع پر وہ چاہتے ہیں کہ ہر زلمی فین اس اینتھم کے ساتھ خوشیاں منائے،گزشتہ برسوں کی طرح اس مرتبہ بھی پشاور زلمی نے اپنے ریجنل اینتھم کے ذریعے فینز کو ایک خاص تحفہ دینے کی روایت کو زندہ رکھا ہے ۔
شائقین کا خیال ہے کہ یہ اینتھم نہ صرف پی ایس ایل 2026 کے دوران سٹیڈیمز میں گونجے گا بلکہ خیبر پختونخوا کے ہر گھر اور دل میں بھی گونجتا رہے گا ۔
