آئی جی خیبر پختونخوا ذوالفقارحمید نے کہا ہے کہ دارالعلوم حقانیہ اکوڑہ خٹک نوشہرہ اور بنوں کینٹ پر حملوں میں ملوث دہشتگردوں کے نیٹ ورک کا سراغ لگا لیا ہے ۔
پشاور میں صحافیوں سے گفتگو کرتے ہوئے انسپکٹر جنرل پولیس ذوالفقارحمید نے کہا کہ دونوں کیسز میں اہم شواہد ملے ہیں ۔
ذوالفقارحمید کا مزید کہنا تھا کہ دونوں واقعات سے متعلق کئی افراد کو حراست میں لیا ہے، مزید گرفتاریوں کے بعد تفصیلات شیئر کی جائیں گی ۔
واضح رہے کہ 28 فروری کو نوشہرہ میں دارالعلوم حقانیہ اکوڑہ خٹک کی جامع مسجد میں خودکش دھماکے کے نتیجے میں جمعیت علمائے اسلام (س) کے سربراہ مولانا حامد الحق سمیت 6 افراد شہید اور 20 زخمی ہو گئے تھے ۔
دوسری جانب بنوں کینٹ پر ہونے والے حملے میں سکیورٹی فورسز نے 16 دہشتگردوں کو جہنم واصل کیا تھا جبکہ مقابلے میں فورسز کے 6 جوان بھی شہید ہوئے تھے ۔
