پاک فوج کے شعبہ اطلاعات آئی ایس پی آر کے بیان میں کہا گیا ہے سکیورٹی فورسز نے شمالی وزیرستان میں 2 مختلف کارروائیاں کیں اور فائرنگ کے تبادلے میں 4 دہشتگرد مارے گئے جبکہ 2 زخمی بھی ہوئے ۔
آئی ایس پی آر کے مطابق پہلی کارروائی میں شمالی وزیر رستان کے علاقہ سپن وام میں سکیورٹی فورسز نےدہشتگردوں کے ایک گروہ کی پاک افغان بارڈرسے پاکستان میں دراندازی کی کوشش ناکام بنادی۔
آئی ایس پی آر کا کہنا ہے کہ سکیورٹی فورسز اور پاکستان میں دراندازی کی کوشش کرنے والے دہشتگردوں کے درمیان فائرنگ کے تبادلے میں 2 دہشتگرد ہلاک اور 2 زخمی ہوگئے۔
آئی ایس پی آر کا مزید کہنا تھا کہ دوسری کارروائی بھی سپن وام میں خفیہ اطلاعات پر کی گئی ،اس دوران بھی فائرنگ کے تبادلے میں 2 دہشتگرد مارےگئے۔
سکیورٹی فورسز کا علاقے میں کلیئرنس آپریشن جاری ہے اور سکیورٹی فورسز سرحدیں محفوظ بنانے اور دہشت گردی کے خاتمے کےلیے پُر عزم ہیں۔
