پاک افغان سرحد پر کشیدگی اور آپریشن غضب للحق
پاک افغان سرحد پر افغان طالبان رجیم کی مبینہ بلااشتعال کارروائیوں کے بعد پاکستان کی مسلح افواج کا آپریشن "غضب للحق” جاری ہے۔ سکیورٹی ذرائع کے مطابق جوابی کارروائیوں میں افغان طالبان کے 133 کارندے ہلاک اور 200 سے زائد زخمی ہوئے، جبکہ 27 افغان چوکیاں مکمل طور پر تباہ کر دی گئیں۔
افغان طالبان کی جانب سے سرحد کے مختلف مقامات پر فائرنگ کے بعد پاکستانی فورسز نے ناوگئی سیکٹر باجوڑ، تیراہ خیبر، چترال، مہمند، کرم اور انگور اڈہ سمیت مختلف علاقوں میں بھرپور جواب دیا۔ متعدد افغان چیک پوسٹیں، اسلحہ ڈپو اور سیکٹر ہیڈکوارٹرز کو نشانہ بنایا گیا۔
بھاری عسکری نقصان اور فضائی کارروائیاں
سکیورٹی ذرائع کے مطابق کارروائیوں میں تین افغان بٹالین ہیڈکوارٹرز، دو کور ہیڈکوارٹرز، تین بریگیڈ ہیڈکوارٹرز اور دو اسلحہ ڈپو تباہ کیے گئے۔ اس کے علاوہ 80 سے زائد ٹینک، توپ خانے اور بکتر بند گاڑیاں بھی تباہ ہوئیں۔
پاک فضائیہ نے ننگرہار اور قندھار میں مبینہ طور پر اہم ایمونیشن ڈپو اور لاجسٹکس بیسز کو نشانہ بنایا۔ ڈرونز کے ذریعے بھی افغان پوسٹوں کو ٹارگٹ کیا گیا جبکہ کواڈ کاپٹر حملوں کی کوششیں ناکام بنا دی گئیں۔ وطن کے دفاع میں پاک فوج کے دو جوان شہید جبکہ تین زخمی ہوئے۔
سول آبادی پر حملے اور زخمی شہری
سکیورٹی ذرائع کے مطابق پاک فوج کی کارروائی کے بعد افغان طالبان نے باجوڑ کے علاقوں لغڑئی اور گرد و نواح میں مارٹر گولے فائر کیے، جس کے نتیجے میں تین خواتین سمیت پانچ افراد زخمی ہوئے۔ زخمیوں کو خار اسپتال منتقل کر دیا گیا۔ مزید برآں ایک مسجد کو بھی شیلنگ کا نشانہ بنایا گیا جس سے مسجد کی چھت اور دیگر حصے متاثر ہوئے۔
قومی قیادت کا ردعمل
وزیراعظم محمد شہباز شریف نے افغان طالبان کو مؤثر جواب دینے پر پاک فوج کو خراج تحسین پیش کرتے ہوئے کہا کہ پاکستان اپنی سالمیت اور دفاع پر کوئی سمجھوتہ نہیں کرے گا۔ انہوں نے آرمی چیف عاصم منیر کی قیادت میں افواج کے عزم کو سراہا اور واضح کیا کہ دشمن کی ہر جارحیت کا منہ توڑ جواب دیا جائے گا۔ وفاقی وزیر اطلاعات عطاء اللہ تارڑ نے دعویٰ کیا کہ کارروائیوں میں افغان طالبان کو بھاری جانی و مالی نقصان پہنچا اور متعدد فوجی تنصیبات تباہ کی گئیں۔ وزیر مملکت برائے داخلہ طلال چوہدری نے کہا کہ پاکستان اپنے عوام کے امن کے لیے ہر حد تک جائے گا اور افغانستان کو پرامن ہمسایہ بننا ہوگا۔ گورنر خیبرپختونخوا فیصل کریم کنڈی نے کہا کہ جنگ افغانستان نے شروع کی لیکن اس کا اختتام پاکستان کرے گا۔
وزیراعلیٰ پنجاب مریم نواز اور وزیراعلیٰ سندھ مراد علی شاہ نے بھی پاک فوج کی کارروائیوں کی حمایت کرتے ہوئے دشمن کی جارحیت کی مذمت کی اور قومی یکجہتی کا اظہار کیا۔
