خیبر پختونخوا میں دہشتگردوں پر زمین تنگ کردی گئی، تازہ کارروائیوں میں مزید 7 دہشت گردوں کو ہلاک کردیا گیا، آئی ایس پی آر کے مطابق یہ کارروائیاں خفیہ اطلاع پر مہمند، لکی مروت اور ٹانک میں کی گئیں ۔
پاک فوج کے شعبہ تعلقات عامہ کی جانب سے جاری بیان کے مطابق خوارج کی موجودگی کی مصدقہ اطلاعات پر سکیورٹی فورسز نے ضلع مہمند میں ٹارگٹڈ کارروائی کی، آپریشن کے دوران شدید فائرنگ کا تبادلہ ہوا جس میں 4 دہشتگردوں کو اپنے انجام تک پہنچادیا گیا ۔
بیان میں کہا گیا ہے کہ لکی مروت میں کیے گئے ایک اور انٹیلی جنس بیسڈ آپریشن میں سکیورٹی فورسز نے مقابلے کے دوران 2 دہشتگردوں کو ہلاک کر دیا ۔
آئی ایس پی آر کا کہنا ہے کہ تیسری کارروائی ٹانک میں کی گئی جہاں تیسرے مقابلے میں ایک اور خوارجی کو ٹھکانے لگا دیا گیا ۔
کارروائیوں کے بعد تمام علاقوں میں کلیئرنس اور سینیٹائزیشن آپریشنز جاری ہیں تاکہ کسی بھی بھارتی سرپرستی یافتہ باقی ماندہ دہشتگردوں کا خاتمہ یقینی بنایا جا سکے ۔
ترجمان کے مطابق فیڈرل ایپکس کمیٹی برائے نیشنل ایکشن پلان کی منظوری کے تحت جاری عزمِ استحکام کے تحت پاک فوج اور قانون نافذ کرنے والے اداروں کی انسدادِ دہشتگردی مہم پوری شدت کے ساتھ جاری رہے گی تاکہ ملک سے بیرونی حمایت یافتہ دہشتگردی کا مکمل قلع قمع کیا جا سکے ۔
