پاکستان کے اقوامِ متحدہ میں مستقل مندوب، سفیر سید حیدر شاہ نے سلامتی کونسل کی توجہ افغانستان کی بگڑتی ہوئی سکیورٹی صورتحال اور وہاں سرگرم دہشت گرد تنظیموں سے پیدا ہونے والے علاقائی خطرات کی جانب مبذول کرائی ہے ۔
ان کا مؤقف واضح ہے کہ افغانستان میں دہشت گرد گروہوں کی موجودگی اور بڑھتی ہوئی صلاحیتیں اب صرف پاکستان کا مسئلہ نہیں رہیں، بلکہ پورے خطے اور عالمی امن کے لیے ایک سنگین چیلنج بن چکی ہیں ۔
گزشتہ تین برسوں کے دوران افغانستان سے جنم لینے والی دہشت گردی کے نتیجے میں پاکستان 4,700 سے زائد قیمتی جانیں کھو چکا ہے، افغان سرزمین پر دہشت گرد تنظیموں کو حاصل محفوظ ٹھکانے، وہاں ان کی تنظیم سازی، بھرتی اور حملوں کی منصوبہ بندی اس خطرے کو مزید بڑھا رہی ہے ۔
اس کے ساتھ بیرونی معاونت، غیر قانونی اسلحے اور جدید ٹیکنالوجی تک دہشت گردوں کی رسائی علاقائی سلامتی کے لیے نئے خطرات پیدا کر رہی ہے، اقوامِ متحدہ کو اس صورتحال پر فوری اور سنجیدہ غور کرنا ہوگا ۔
دوسری جانب، سلامتی کونسل کے 1267 پابندیوں کے نظام کی افادیت اور یکساں اطلاق کا ازسرِنو جائزہ بھی ضروری ہے، پاکستان اور چین نے بلوچستان لبریشن آرمی (بی ایل اے) اور اس کے مجید بریگیڈ کو اقوامِ متحدہ کی پابندیوں کی فہرست میں شامل کرنے کی مشترکہ درخواست دی، تاہم اس معاملے کو سلامتی کونسل میں مزاحمت کا سامنا ہے
پاکستان کا مؤقف ہے کہ بی ایل اے کو بیرونی معاونت، بشمول بھارتی حمایت، حاصل ہے۔ ایسے میں اس تنظیم کے خلاف مؤثر عالمی پابندیوں کا فقدان بین الاقوامی انسدادِ دہشت گردی نظام کی یکسانیت پر سوالات اٹھاتا ہے ۔
اقوامِ متحدہ کے لیے ضروری ہے کہ دہشت گردی کے خلاف اقدامات میں کسی سیاسی مصلحت یا امتیاز کی گنجائش نہ ہو، سلامتی کونسل کی متعلقہ کمیٹیوں، مانیٹرنگ ٹیموں اور انسدادِ دہشت گردی کے اداروں کو باہمی رابطہ اور معلومات کا تبادلہ مؤثر بنانا ہوگا ۔
انہیں دہشت گرد گروہوں کو اسلحے اور جدید ٹیکنالوجی کی فراہمی، بیرونی معاونت کے نیٹ ورکس اور پابندیوں پر عمل درآمد کی نگرانی کو بھی ترجیح دینی چاہیے ۔
دہشت گردی ایک مشترکہ عالمی خطرہ ہے؛ اس کا مقابلہ بھی مربوط عالمی تعاون، یکساں اصولوں اور عملی اقدامات ہی سے ممکن ہے ۔

