یورپ کے دیگر ممالک کی طرح اسپین کے شہر بارسلونا میں بھی اوورسیز پاکستانی و کشمیری کمیونٹی نے بھارت کی ریاستی دہشت گردی کی شدید مذمت کی اور پاک فوج کے ساتھ بھرپور یکجہتی کا اظہار کیا۔ مظاہرین نے "پاکستان زندہ باد” اور "پاک فوج زندہ باد” کے فلک شگاف نعرے لگائے اور سپہ سالار جنرل سید عاصم منیر پر مکمل اعتماد کا اظہار کیا۔
ای یو پاک فرینڈ شپ فیڈریشن، ندائے کشمیر اسپین اور پاک فیڈریشن اسپین کے زیر اہتمام یہ مظاہرہ بارسلونا کے مرکزی سیاحتی مقام "پلاسا کتلونیا” میں کیا گیا۔ مظاہرے میں اوورسیز پاکستانی کمیونٹی کی تمام سیاسی، سماجی اور مذہبی تنظیمات نے متحد ہوکر شرکت کی، جن میں دس سالہ بچوں سے لے کر ستر سال کے بزرگ تک شامل تھے۔
مظاہرین نے بھارت کے حالیہ پہلگام حملے کو ایک ڈرامہ قرار دیا اور بین الاقوامی برادری کو باور کرایا کہ بھارت خود اپنے شہریوں کو دہشتگردی کا نشانہ بنا کر اس کا الزام پاکستان پر ڈالنے کی سازش کرتا ہے۔ انہوں نے کہا کہ پاکستان ہر فورم پر غیرجانبدار تحقیقات کے لیے تیار ہے مگر بھارت ہمیشہ جھوٹے پروپیگنڈے کے پیچھے چھپتا ہے۔
مظاہرے کی خاص بات یہ تھی کہ تمام سیاسی جماعتوں کے نمائندے، کارکنان اور مختلف مکاتب فکر سے تعلق رکھنے والے افراد ایک ہی پرچم کے سائے تلے متحد نظر آئے۔ ہاتھوں میں سبز ہلالی پرچم، بینرز اور پلے کارڈز لیے شرکاء نے "انڈیا ٹیررسٹ”، "مودی ٹیررسٹ”، "تیراضمیر میرا ضمیر، عاصم منیر عاصم منیر” جیسے نعرے لگائے۔
اس مظاہرے نے بارسلونا میں موجود بین الاقوامی سیاحوں کی بھی توجہ حاصل کی، جو بھارتی ریاستی دہشتگردی کے خلاف لگنے والے نعروں کو سن کر حیرت اور افسوس کا اظہار کرتے رہے۔ مقررین نے اپنے خطابات میں کہا کہ اوورسیز پاکستانی وطن کے دفاع کے لیے پاک فوج کے شانہ بشانہ کھڑے ہیں اور دشمن کے ہر وار کا منہ توڑ جواب دیں گے۔
شرکاء نے اعلان کیا کہ جنرل سید عاصم منیر قوم کا فخر ہیں اور پاک فوج کی قربانیوں کو کبھی فراموش نہیں کیا جا سکتا۔ یہ مظاہرہ اوورسیز پاکستانیوں کی وطن سے محبت اور افواج پاکستان کے ساتھ والہانہ عقیدت کا عملی مظاہرہ تھا، جو ہمیشہ یاد رکھا جائے گا۔
