دیوسائی کے برفیلے اور بلند ترین میدانوں میں پاک آرمی کے زیرِ اہتمام سنو لیپرڈ تربیتی مقابلے منعقد ہوئے، جہاں منفی 24 سینٹی گریڈ کے سخت موسمی حالات میں فوجی جوانوں نے اپنی قوت، مہارت، اور ثابت قدمی کا مظاہرہ کیا۔ ان سالانہ مقابلوں کا مقصد پاک فوج کے سپوتوں کو بلند ترین میدان جنگ میں لڑنے کی تربیت دینا اور آپریشنل تیاریوں کو مزید بہتر بنانا ہے۔
فورس کمانڈ ناردرن ایریاز کی فارمیشن کے دستے 12 ہزار فٹ سے زائد بلندی پر مختلف کمبیٹ مراحل سے گزرے، جہاں انہوں نے اپنی جسمانی و ذہنی استعداد کو پرکھا۔ سکردو، سیاچن، گلگت، اور منی مرگ سے کل 23 ٹیموں نے ان مقابلوں میں شرکت کی، جن میں 275 کھلاڑی اور ان کے معاون عملہ شامل تھے۔
مقابلے میں شامل جوانوں نے چیلنجنگ مراحل جیسے برفیلے راستوں پر پیدل مارچ، ہتھیاروں کے استعمال، اور بلند و دشوار گزار پہاڑی علاقوں میں رہنے کی مہارتوں کا عملی مظاہرہ کیا۔ ان مقابلوں نے نہ صرف ان کی عسکری مہارت کو نکھارا بلکہ انہیں سرد موسم اور بلندی پر لڑنے کے لیے جسمانی و ذہنی طور پر مزید مضبوط بنایا۔
سالانہ سنو لیپرڈ مقابلوں کا بنیادی مقصد دشمن کے ناپاک عزائم کو ناکام بنانا اور ہر قیمت پر علاقائی سرحدوں کی حفاظت یقینی بنانا ہے۔ یہ تربیت پاک فوج کی آپریشنل تیاریوں میں اضافہ کرتی ہے اور ثابت کرتی ہے کہ ہماری افواج مادرِ وطن کی حفاظت کے لیے ہر وقت تیار ہیں۔
