راولپنڈی: پاک فوج کی کور کمانڈرز کانفرنس نے انسدادِ دہشتگردی کیلئے اختیار کی جانے والی حکمت عملی کے تحت آپریشن عزمِ استحکام کو اہم قدم قرار دے دیا۔ آئی ایس پی آر کے مطابق آرمی چیف جنرل سید عاصم منیرکی زیرصدارت 265ویں کور کمانڈرز کانفرنس ہوئی جس میں فورم نے امن و استحکام کیلئے شہدا، افواجِ پاکستان، دیگر قانون نافذ کرنے والے اداروں کی قربانیوں کو خراج عقیدت پیش کیا۔
آئی ایس پی آر کا کہنا ہے کہ فورم نے آپریشن’عزمِ استحکام’ کے مختلف پہلوؤں پر تفصیلی تبادلہ خیال کیا۔ آئی ایس پی آر کی جانب سے جاری بیان میں کہا گیا ہے کہ فورم نے انسدادِ دہشتگردی کیلئے اختیار کی جانے والی حکمت عملی کے ضمن میں عزمِ استحکام کو اہم قدم قرار دیا ہے۔ آئی ایس پی آر کے مطابق چند حلقوں کی جانب سے عزمِ استحکام کے حوالے سے بلاجواز تنقید کی جارہی ہے، مخصوص مفادات کے حصول کے لیے قیاس آرائیوں پر فورم نے اظہارِ تشویش کیا۔
آئی ایس پی آر کا کہنا ہے کہ ملک میں پائیدار استحکام اور معاشی خوشحالی کے لیے عزمِ استحکام بہت ضروری ہے، دہشتگردی اور غیر قانونی سرگرمیوں کے گٹھ جوڑ کو ختم کرنے کیلئے عزم استحکام وقت کا اہم تقاضہ ہے۔ آئی ایس پی آر کے مطابق کانفرنس کے شرکا نے اظہار خیال کیا کہ عوام کے تعاون سے اپنی آئینی حدود میں رہتے ہوئے ایک پائیدارحل کیلئے کوشاں ہیں۔ کانفرنس میں سیاسی عزائم کی تکمیل کیلئے جاری ڈیجیٹل دہشتگردی ریاستی اداروں کے خلاف سازش قرار دی گئی۔
آئی ایس پی آر کے مطابق فورم نے ملک میں جاری سماجی اور معاشی ترقی کیلئے کی جانے والی کوششوں میں مکمل تعاون کا اعادہ کیا اور سرمایہ کاروں کا اعتماد بحال کرنے، معاشی ترقی واستحکام کیلئے حکومتی کوششوں کی مکمل تائید کی۔ آئی ایس پی آرمی کے مطابق اس موقع پر آرمی چیف جنرل عاصم منیر نے کہا کہ پاک فوج تمام اندرونی و بیرونی چیلنجز کو ناکام بنانے کیلئے ہمیشہ سے تیار رہی ہے۔
