وزیرِاعظم شہبازشریف کی ہدایت پر پاکستان کی جانب سے افغانستان کے زلزلہ متاثرین کے لیے امدادی سامان افغان حکام کے حوالے کردیا گیا ۔
طورخم: این ڈی ایم اے کی جانب سے افغانستان کے زلزلہ متاثرین کے لیے 105 ٹن امدادی سامان بھیجا گیا جس میں راشن بیگز، خیمے، کمبل، چٹائیاں اور ادویات شامل ہیں ۔
امدادی سامان 40 فٹ کنٹینر والے 5 ٹرکوں کے ذریعے طور خم بارڈر کے راستے افغانستان پہنچایا گیا۔ سامان گزشتہ روز اسلام آباد میں این ڈی ایم اے کے وئیر ہاؤس سے روانہ ہوا اور طور خم بارڈر پر افغان حکام کے حوالے کیا گیا ۔
امدادی سامان کی حوالگی کے موقع پر قونصل جنرل پاکستان جلال آباد قونصلیٹ شفقت اللہ اور افغانستان کے کونسل جنرل پشاور قونصلیٹ حافظ محب اللہ شاکر بھی اس موقع پر موجود تھے ۔
این ڈی ایم اے کے افسران سمیت افغان حکومت کے نمائندگان اور پاکستان میں افغانستان ایمبیسی کے عہدے داران نے بھی شرکت کی۔ افغان سفارت خانہ نے بھی بروقت امدادی سامان کی ترسیل پر شکریہ ادا کیا ۔
