وفاقی حکومت نے اپنے رائٹ سائزنگ اقدامات کے تحت مختلف وزارتوں اور محکموں میں ہزاروں سرکاری آسامیاں ختم کر دی ہیں، جس کا مقصد انتظامی ڈھانچے کو زیادہ مؤثر بنانا اور اخراجات میں کمی لانا ہے۔
دستاویزات کے مطابق گریڈ 1 سے لے کر گریڈ 22 تک مجموعی طور پر 32,070 آسامیاں ختم کی گئی ہیں، جن کا سالانہ مالیاتی بوجھ 30 ارب روپے سے زائد بنتا ہے۔
رپورٹ میں یہ بھی بتایا گیا ہے کہ کابینہ ڈویژن نے مزید 7,826 ایسی "ڈائنگ آسامیاں” شناخت کی ہیں، جنہیں بتدریج ختم کیا جائے گا۔ ان آساموں کا سالانہ مالی حجم 6 ارب روپے سے زائد بتایا گیا ہے۔
اس اقدام میں گریڈ 17 سے گریڈ 22 تک کی 1,102 آسامیاں اور گریڈ 1 سے 16 تک کی 30,968 آسامیاں شامل ہیں۔ ان میں سے گریڈ 1 کی 7,305، گریڈ 2 کی 2,853، گریڈ 4 کی 2,456، گریڈ 5 کی 2,887، گریڈ 14 کی 1,274 اور گریڈ 16 کی 1,340 آسامیاں ختم کی جا چکی ہیں۔
یہ اقدامات سرکاری محکموں کی غیر ضروری بوجھ سے نجات دلانے، مالی وسائل کی بچت کرنے اور کارکردگی کو بہتر بنانے کے لیے کیے گئے ہیں۔ حکومتی ذرائع کے مطابق یہ عمل بتدریج جاری رہے گا۔
