اسلام آباد: نائب وزیراعظم و وزیر خارجہ محمد اسحاق ڈار اور کویت کے وزیر خارجہ شیخ جراح جابر الاحمد الصباح کے درمیان ٹیلیفونک گفتگو ہوئی.
گفتگو میں خطے کی بدلتی ہوئی صورتحال اور اس کے وسیع تر معاشی اثرات پر تبادلہ خیال کیا گیا۔
ترجمان دفتر خارجہ کے مطابق گفتگو کے دوران دونوں رہنماؤں نے خطے میں امن و استحکام کے فروغ کے لیے تعمیری روابط اور سفارت کاری کو آگے بڑھانے پر زور دیا۔
نائب وزیراعظم نے پاکستان کی جانب سے امن کے فروغ کے لیے جاری سفارتی کوششوں کو اجاگر کیا، جبکہ کویتی وزیر خارجہ نے امت مسلمہ اور عالمی برادری کے لیے پاکستان کی مخلصانہ کوششوں کو سراہا۔
دونوں رہنماؤں نے پاکستان اور کویت کے درمیان مضبوط برادرانہ تعلقات کا اعادہ کرتے ہوئے مستقبل میں قریبی رابطے میں رہنے پر اتفاق کیا۔
