اسلام آباد: وزیر اعظم شہباز شریف نے کہا ہے کہ پاکستان نے دہشت گردی کے خلاف عالمی جنگ میں ہر اول دستے کا کردار ادا کیا اور اپنی قربانیوں سے دنیا کو محفوظ بنایا۔
دہشت گردی سے متاثرہ افراد کو خراجِ تحسین پیش کرنے کے عالمی دن کے موقع پر اپنے پیغام میں وزیر اعظم نے کہا کہ پاکستان آج دنیا کے ساتھ کھڑا ہوکر دہشت گردی کے متاثرین سے اظہار یکجہتی کرتا ہے۔ ان کے مطابق یہ جذبہ دراصل پاکستان کے مخلص قومی احساسات اور عزم کی عکاسی ہے۔
شہباز شریف نے کہا کہ پاکستان کے عوام، مسلح افواج اور قانون نافذ کرنے والے ادارے دہشت گردی کے خلاف صف آراء رہے۔ ہم نے عزم، ہمت اور بہادری کے ساتھ اس ناسور کو شکست دی۔ ان کا کہنا تھا کہ دہشت گردی کے حملے ہماری قومی غیرت، حمیت اور امن کے عزم کو کبھی کمزور نہیں کر سکے۔ پاکستان نے اس جنگ میں 90 ہزار قیمتی جانوں کی قربانی دی جبکہ معیشت کو بھی بھاری نقصان برداشت کرنا پڑا۔
وزیر اعظم نے کہا کہ ملک کا ہر شہر، گاؤں، اسکول، بازار اور شاہراہ دہشت گردی کی تلخ داستان سناتا ہے۔ جہاں پاکستانی قوم اپنے شہداء اور متاثرین کی قربانیوں پر غمزدہ ہے، وہیں اپنی بہادری اور استقامت پر فخر بھی کرتی ہے۔ آج کی نوجوان نسل اسی جذبے کے ساتھ پروان چڑھ رہی ہے کہ ملکی سلامتی کا تحفظ ہر شہری کی اولین ذمہ داری ہے۔
انہوں نے کہا کہ وفاقی اور صوبائی حکومتیں دہشت گردی کے خاتمے کے لیے انتھک جدوجہد کر رہی ہیں جبکہ قانون نافذ کرنے والے اور انٹیلی جنس ادارے بھی اپنے فرائض بخوبی انجام دے رہے ہیں۔ شہباز شریف نے بتایا کہ آپریشن ضربِ عضب، آپریشن ردالفساد اور انٹیلی جنس بیسڈ آپریشنز کے ذریعے دہشت گردوں کے عزائم کو ناکام بنایا گیا۔ سول اور ملٹری انٹیلی جنس اداروں نے پاکستان کو بے شمار سانحات سے محفوظ رکھا۔
وزیر اعظم نے قوم کی جانب سے شہداء اور متاثرین کو سلام پیش کیا اور دہشت گردی سے نبرد آزما اداروں کو خراجِ تحسین پیش کیا۔ انہوں نے کہا کہ نیشنل ایکشن پلان دہشت گردی کے خلاف پاکستان کی جامع حکمت عملی ہے جو نظریاتی، ادارہ جاتی، انتظامی اور بیانیے کے محاذ پر مربوط اقدامات کی عکاسی کرتا ہے۔
اپنے پیغام کے اختتام پر شہباز شریف نے کہا کہ دہشت گردی کے خلاف جنگ میں قومی اتحاد اور یکجہتی ہی امن، ترقی اور خوشحالی کی ضمانت ہے۔
