وفاقی وزیر اطلاعات عطاء اللّٰہ تارڑ نے کہا ہے کہ پاکستان نے پاک افغان سرحدی علاقوں میں دہشتگردوں کے ٹھکانوں پر محدود نوعیت کی کارروائیاں کی ہیں، ان کارروائیوں میں 26 دہشت گرد ہلاک جبکہ ان کے کئی ٹھکانے تباہ ہوگئے ۔
اسلام آباد: وفاقی وزیر عطا اللہ تارڑ نے کہا کہ انٹیلیجنس اطلاعات پر افغانستان میں دہشت گرد کیمپوں اور محفوظ ٹھکانوں کو انتہائی درستگی اور احتیاط سے نشانہ بنایا گیا ۔
ان کا کہنا تھا کہ کارروائی کے دوران 4 اہم اہداف مکمل طور پر تباہ کر دیے گئے، تباہ کیے گئے اہداف میں ایک تربیتی مرکز، ایک خفیہ ٹھکانہ اور اسلحہ کا ذخیرہ شامل تھے ۔
وفاقی وزیر کا مزید کہنا تھا کہ خارجی کمانڈر علیم خان خوشحالی اور کمانڈر اختر محمد جانی خیل کے مراکز نشانہ بنائے گئے، گزشتہ روز دہشت گردوں کیخلاف کارروائیاں پاکستان میں مختلف حملوں کے جواب میں کی گئیں ۔
عطا تارڑ نے کہا کہ پاکستان میں 9 جون کو موسیٰ درہ میں فیڈرل کانسٹیبلری کی چوکی پر دہشت گرد حملہ ہوا، 2 جون کو شمالی وزیرستان میں ایک فوجی چوکی پر گاڑی میں نصب خودکش بم حملہ ہوا، 9 مئی کو بنوں کے ایک پولیس اسٹیشن پر خودکش حملہ کیا گیا ۔
وفاقی وزیر اطلاعات کا کہنا ہے کہ پاکستان ہمیشہ خطے میں امن اور استحکام کے فروغ کے لیے کوشاں رہا ہے، اپنے شہریوں کی جان و مال کا تحفظ اور قومی سلامتی ہماری اولین ترجیح ہے ۔
