پشاور: عمران خان کی ہمشیرہ علیمہ خان نے اپنے نام سے منسوب ایک بیان کی تردید کرتے ہوئے کہا ہے کہ وہ فضل الٰہی کو جانتی تک نہیں ہیں اور ان سے منسوب کیے جانے والے بیانات بے بنیاد ہیں۔
تفصیلات کے مطابق اڈیالہ جیل کے باہر صحافیوں نے علیمہ خان سے خیبرپختونخوا اسمبلی کے رکن فضل الٰہی کے اس بیان کے حوالے سے سوال کیا، جس میں انہوں نے دعویٰ کیا تھا کہ پاکستان تحریک انصاف کے بعض ذمہ داران عمران خان کی رہائی کے حوالے سے سنجیدہ نہیں اور وہ نہیں چاہتے کہ بانی پی ٹی آئی جیل سے باہر آئیں۔
اس سوال کے جواب میں علیمہ خان نے کہا کہ "فضل الٰہی کون ہیں؟ میں انہیں جانتی بھی نہیں۔ کم از کم مجھ سے منسوب من گھڑت بیانات جاری کرنے سے گریز کیا جانا چاہیے۔”
انہوں نے واضح کیا کہ ان کے نام سے منسوب کیے جانے والے بعض بیانات حقیقت پر مبنی نہیں اور ایسے دعوؤں سے اجتناب کیا جانا چاہیے۔
