وزیراعظم شہباز شریف نے کہا ہے کہ جنگ میں بھارت کو شکست دینے کے بعد دنیا میں پاکستان کا وقار بلند ہوا ہے، پاک فوج نے انتہائی مختصر وقت میں بھارت کی تمام غلط فہمی دور کردی ۔
لاہور میں پاک بزنس ایکسپریس کی افتتاحی تقریب سے خطاب میں وزیراعظم شہبازشریف کا کہنا تھا کہ ہماری مسلح افواج نے انتہائی مختصر وقت میں دشمن کی غلط فہمی دور کردی، فوج نے بھرپور تیاری، دلیری اور مہارت کے ساتھ دشمن کا مقابلہ کیا ۔
انہوں نے کہا کہ پاکستان اور بھارت کے درمیان 4 روزہ جنگ انتہائی خطرناک تھی، تاہم پاکستان نے یہ جنگ جیتی، جس کی پوری دنیا معترف ہے، قوم کی دعائیں ہمارے ساتھ تھیں ۔
وزیراعظم نےکہا کہ امریکی صدر ڈونلڈ ٹرمپ کئی بار کہہ چکے ہیں کہ پاک بھارت سیز فائر انہوں نے کرایا، یہ بھی پاکستان کی بڑی سفارتی کامیابی ہے ۔
وزیراعظم شہبازشریف کا مزید کہنا تھا کہ پاکستان امریکہ کے ساتھ اپنے تعلقات بہتر کر رہا ہے، اللہ نے پاکستان کو عزت دی ہے ۔
وزیراعظم نے معیشت کے حوالے سے بات کرتے ہوئے بتایا کہ معاشی میدان میں ٹیم ورک کے ذریعے کامیابی ملی، منہگائی اور پالیسی ریٹ کم ہوا ہے ۔
ان کا مزید کہنا تھا کہ ٹیم ورک کے نتیجے میں ہمیں معاشی میدان میں کامیابیاں مل رہی ہیں، مہنگائی کی شرح میں کمی واقع اور میکرو لیول کے اشاریوں میں حوصلہ افزا کامیابی ملی ہے ۔
