پشاور (خصوصی رپورٹر) — سینئر اداکار اور پرائیڈ آف پرفارمنس ایوارڈ یافتہ نجیب اللہ انجم نے کہا ہے کہ پشتون قوم نے ہمیشہ اپنی غیرت، روایات اور ثقافتی اقدار کو برقرار رکھا ہے اور کسی بھی غاصب یا ڈکٹیٹر کے سامنے جھکنے سے انکار کیا ہے۔
ایک نجی چینل کو دیے گئے انٹرویو میں انہوں نے کہا کہ افسوس کے ساتھ کہنا پڑتا ہے کہ گزشتہ دو دہائیوں کے دوران شوبز انڈسٹری میں بعض عناصر نے مالی مفاد کے حصول کے لیے پشتون ثقافت کو غلط انداز میں پیش کیا، جس کے اثرات پاکستان کے ساتھ ساتھ خلیجی ممالک میں بھی دیکھے گئے۔
نجیب اللہ انجم کے مطابق بعض پشتو فلموں کے غیر معیاری نام، کمزور اسکرپٹس اور نغمات میں غیر اخلاقی عناصر کی شمولیت نے پشتون کلچر کی اصل شناخت کو نقصان پہنچایا ہے۔
انہوں نے اس صورتحال کی ذمہ داری متعلقہ سرکاری ثقافتی اداروں پر بھی عائد کی اور کہا کہ بعض ادارے ثقافت کی بنیادی روح سے ہی ناواقف نظر آتے ہیں، جس کے باعث معیاری رہنمائی کا فقدان رہا۔
