پشاور (خصوصی رپورٹر) — عوامی شکایات کے بعد ضلعی انتظامیہ پشاور نے پیشہ ور گداگروں کے خلاف آپریشن کا آغاز کر دیا۔ طویل عرصے سے شہر کے مختلف بازاروں اور سڑکوں پر گداگروں کی بڑھتی ہوئی تعداد کے باعث شہری خصوصاً خریداری کے لیے آنے والی خواتین کو شدید ذہنی کوفت کا سامنا تھا۔
اس حوالے سے سوشل میڈیا اور اخبارات میں بھی بارہا شکایات سامنے آئی تھیں۔ گزشتہ روز انسدادِ گداگری ٹیموں نے علاقہ مجسٹریٹ کی نگرانی میں شہر کے مختلف علاقوں میں کارروائیاں کیں۔
کارروائی کے دوران پشاور صدر، یونیورسٹی ٹاؤن، جنرل بس اسٹینڈ، جی ٹی روڈ، کوہاٹ روڈ، چارسدہ روڈ، ہشت نگری، اشرف روڈ اور دیگر علاقوں سے درجنوں پیشہ ور اور ہٹے کٹے مرد و خواتین کو گرفتار کر لیا گیا۔
ضلعی انتظامیہ کا کہنا ہے کہ شہر میں پیشہ ور گداگری کے خاتمے کے لیے یہ آپریشن جاری رکھا جائے گا۔ دوسری جانب شہریوں نے اس کارروائی کو خوش آئند قرار دیتے ہوئے انتظامیہ کے اقدام پر اطمینان کا اظہار کیا ہے۔
