اسلام آباد: حکومت نے پیٹرول پر 100 روپے فی لیٹر ریلیف حاصل کرنے کے طریقہ کار کی تفصیلات جاری کردی ہیں۔ وزیر آئی ٹی شزا فاطمہ کے مطابق حکومتی اسکیم کے تحت 2 ویلر، 3 ویلر اور 800 سی سی تک کی گاڑیوں کے مالکان کو پیٹرول پر سبسڈی دی جائے گی۔
وفاقی وزرا عطا تارڑ اور علی پرویز ملک کے ہمراہ پریس کانفرنس کرتے ہوئے شزا فاطمہ نے بتایا کہ 2 اور 3 ویلر گاڑیوں کے لیے ماہانہ 20 لیٹر پیٹرول جبکہ 800 سی سی تک کی گاڑیوں کے لیے 30 لیٹر پیٹرول پر ریلیف فراہم کیا جائے گا۔
پیٹرول سبسڈی کے لیے رجسٹریشن کیسے ہوگی؟
وزیر آئی ٹی کے مطابق اسکیم کا طریقہ کار دو مراحل پر مشتمل ہے۔ پہلے مرحلے میں رجسٹریشن کرانا ہوگی۔ صارف کو اپنے شناختی کارڈ پر رجسٹرڈ موبائل سم سے REG، شناختی کارڈ نمبر، صوبے کا پہلا حرف اور بائیک یا گاڑی کی رجسٹریشن کی تاریخ لکھ کر 9771 پر ایس ایم ایس بھیجنا ہوگا۔
مثال کے طور پر سندھ کے صارف کو صوبے کے لیے S لکھنا ہوگا۔
پیٹرول لیتے وقت کیا کرنا ہوگا؟
شزا فاطمہ کے مطابق رجسٹریشن مکمل ہونے کے بعد جب صارف پیٹرول خریدنے جائے گا تو اسے 9771 پر TOK لکھ کر ایس ایم ایس کرنا ہوگا۔ موصول ہونے والا ٹوکن پیٹرول پمپ پر دکھانے کے بعد صارف سبسڈی حاصل کرسکے گا۔
وزیر آئی ٹی نے شہریوں کو خبردار کیا کہ وہ اپنا شناختی کارڈ نمبر یا دیگر ذاتی معلومات کسی کے ساتھ شیئر نہ کریں۔ ان کا کہنا تھا کہ حکومت شہریوں سے نہ کوئی اضافی ڈیٹا مانگے گی اور نہ ہی کسی قسم کے چارجز وصول کرے گی۔
شزا فاطمہ نے مزید کہا کہ اسکیم کے آغاز کے بعد سامنے آنے والی خامیوں کا جائزہ لے کر انہیں دور کیا جائے گا۔
سبسڈی کب سے ملے گی؟
حکومتی اسکیم کے تحت اسلام آباد کے شہری 14 اور 15 ستمبر کی درمیانی شب 12 بجے سے پیٹرول پر ریلیف حاصل کرسکیں گے، جبکہ ملک بھر، بشمول آزاد کشمیر اور گلگت بلتستان، کے شہری 16 اور 17 ستمبر کی درمیانی شب 12 بجے سے اس سہولت سے فائدہ اٹھا سکیں گے۔
