وزیراعظم نے دہشت گردوں کا بہادری سے مقابلہ کرتے ہوئے 10 دہشت گردوں کو جہنم واصل کرنے پر سیکیورٹی فورسز کی کارکردگی کی تعریف کی ہے۔
اپنے بیان میں وزیراعظم شہباز شریف نے بنوں چھاؤنی میں دہشت گردوں کے حملے کی شدید مذمت کرتے ہوئےحملے میں شہید ہونے والے پاک فوج اور فرنٹئیر کانسٹیبلری کے جوانوں کو خراج عقیدت پیش کیا ہے۔
وزیراعظم نے حملے میں شہید ہونے والے جوانوں کے بلندی ء درجات کی دعاء بھی کی ہے اور شہداء کے خاندانوں سے اظہار تعزیت بھی کیا ہے
وزیراعظم نے کہا ہے کہ دہشت گردی کے خلاف پاک فوج اور دیگر سیکیورٹی فورسز کی قربانیاں لازوال ہیں۔پوری قوم دہشت گردی کے خلاف جنگ میں سیکیورٹی فورسز کے ساتھ کھڑی ہے ۔
وزیراعظم کا کہنا تھا کہ ہم حملے میں شہید ہونے والے سیکیورٹی فورسز کے بہادر اور جری جوانوں کو سلام پیش کرتے ہیں اور دہشت گردی کے عفریت کو مکمل ختم کرنے کے لئے پر عزم ہیں۔
