اسلام آباد: وزیر اعظم شہباز شریف نے کہا ہے کہ عوام کے جان و مال کے تحفظ کو یقینی بنانے کے لیے قانون نافذ کرنے والے اداروں کی صلاحیت میں اضافے کے لیے تمام دستیاب وسائل بروئے کار لائے جائیں گے۔
امن و امان کی صورتحال اور وزارت داخلہ کے امور سے متعلق اہم اجلاس کی صدارت کرتے ہوئے وزیر اعظم نے ہدایت جاری کیں۔
وزیر اعظم نے ہدایت کی کہ سیکیورٹی اداروں کو جدید ٹیکنالوجی، بہترین آلات اور پیشہ ورانہ سازوسامان فراہم کیا جائے۔
وزیر اعظم نے کہا کہ قانون نافذ کرنے والے اداروں کے اہلکاروں کو جدید تربیت اور مہارتوں سے آراستہ کرنا وقت کی اہم ضرورت ہے۔
انہوں نے اس بات پر زور دیا کہ اداروں میں کرپشن کے خلاف زیرو ٹالرنس پالیسی پر سختی سے عمل کیا جائے۔
وزیر داخلہ محسن نقوی نے اجلاس کو ایف آئی اے، اسلام آباد پولیس، این سی سی آئی اے، فیڈرل کانسٹیبلری ، سی ڈی اے اور دیگر ماتحت اداروں کی کارکردگی اور مستقبل کے ترقیاتی منصوبوں پر بریفنگ دی۔
اجلاس میں نائب وزیراعظم و وزیر خارجہ محمد اسحاق ڈار ، وفاقی وزرا محسن نقوی ، احسن اقبال ، محمد اورنگزیب ، وزیر مملکت طلال چوہدری اور قانون نافذ کرنے والے اداروں کے سربراہان نے شرکت کی۔
