نائب وزیراعظم و وزیر خارجہ اور چینی وزیر خارجہ کا رابطہ، مشرق وسطیٰ میں فوری جنگ بندی اور امن پر زور

نائب وزیراعظم و وزیر خارجہ محمد اسحاق ڈار نے چین کے وزیر خارجہ وانگ ای کے ساتھ ٹیلیفونک رابطہ کیا جس میں مشرق وسطیٰ کی موجودہ صورتحال پر تفصیلی تبادلہ خیال کیا گیا۔
ترجمان دفتر خارجہ طاہر اندرابی کے مطابق دونوں رہنماؤں نے مشرق وسطیٰ میں فوری جنگ بندی اور امن کی بحالی کی ضرورت پر زور دیتے ہوئے خطے میں استحکام کے لیے تمام کوششوں کی حمایت کا اعادہ کیا۔ گفتگو کے دوران کشیدگی کے خاتمے، امن مذاکرات کی بحالی اور عام شہریوں کے تحفظ کو یقینی بنانے پر بھی اتفاق کیا گیا۔
فریقین نے بحری گزرگاہوں کی سیکیورٹی کو برقرار رکھنے اور اقوام متحدہ کے چارٹر کی پاسداری کی اہمیت پر زور دیا۔ چینی وزیر خارجہ وانگ ای نے قیام امن کے لیے پاکستان کی کوششوں کو سراہتے ہوئے ان کا اعتراف کیا۔ دونوں ممالک نے اس عزم کا اظہار کیا کہ تمام تنازعات کو بات چیت اور سفارت کاری کے ذریعے حل کرنے کی کوششیں جاری رکھی جائیں گی۔