وزیراعظم شہباز شریف نے ایران کے سپریم لیڈر مجتبیٰ خامنہ ای کے نام خط لکھا ہے، وزیراعظم نے اپنے خط میں سابق سپریم لیڈر آیت اللہ خامنہ ای کے قتل پر اظہار تعزیت کیا ہے ۔
اسلام آباد: وزیراعظم نے خط کے ذریعے مجتبیٰ خامنہ ای سے آیت اللّٰہ خامنہ ای کے قتل پر تعزیت کا اظہار کیا اور انہیں ایران کے سپر یم لیڈر کی ذمے داریاں سنبھالنے پر مبارک باد دی ۔
وزیراعظم نے اپنے خط میں ایران کے برادر عوام اور امت مسلمہ کے لیے پاکستانی عوام کی تعزیت اور دعاؤں کا اظہار بھی کیا ہے ۔
وزیراعظم نے کہا کہ آیت اللّٰہ خامنہ ای کے قتل کی وجہ سے پاکستانی عوام شدید دکھ میں ہیں اور اس مشکل وقت میں ایران کی قیادت اور عوام کے ساتھ یکجہتی کے ساتھ کھڑے ہیں ۔
شہباز شریف نے مزید کہا کہ امید ہےآپ کی قیادت آنے والے سالوں میں ایران میں امن، استحکام، وقار اور خوشحالی کی طرف رہنمائی کرے گی ۔
اُن کا کہنا تھا کہ پاکستان اور ایران کے تعلقات، تاریخ، ثقافت اور زبان پر مبنی ہیں، وزیراعظم نے ایران کے ساتھ مل کر کام جاری رکھنے کےعزم کا اعادہ کیا اور کہا دونوں برادر ممالک کے مفاد کے لیے باہمی دلچسپی کے تمام شعبوں میں دو طرفہ تعاون کو مزید مستحکم کیا جائے گا ۔
