عالمی یوم پارلیمان پر وزیراعظم شہباز شریف کا پیغام سامنےآیا ہے، اپنے پیغام میں وزیراعظم نے جمہوری اداروں کے استحکام، آئین کی بالادستی، پارلیمانی طرزِ حکومت، قانون کی حکمرانی اور فیصلہ سازی میں عوام کی بامعنی شمولیت کیلئے پاکستان کے پختہ عزم کا اعادہ کیا ہے ۔
اسلام آباد: وزیراعظم شہبازشریف نے اپنے پیغام میں کہا کہ آئینِ پاکستان جمہوری نظام حکومت اور جمہوری اقدار کی ضمانت دیتا ہے، آئین کی اصل روح کے مطابق اقتدار کا سرچشمہ عوام ہیں اور منتخب نمائندگان یہ اختیار عوام کی خدمت اور فلاح و بہبود کیلئے ایک مقدس امانت کے طور پر استعمال کرتے ہیں ۔
انہوں نے کہا کہ پارلیمان وہ آئینی فورم ہے جہاں قومی مسائل پر عوام کی ترجمانی کرتے ہوئے قوانین وضع کئے جاتے ہیں، تمام طبقات اور گروہوں کی جامع شمولیت اور مؤثر نمائندگی کے تناظر میں بھی پاکستان کی پارلیمانی جمہوریت نے نمایاں پیشرفت کی ہے۔
ان کا کہنا تھا کہ ایک حقیقی نمائندہ پارلیمان کے طور پر خواتین، اقلیتوں، چھوٹے صوبوں اور دیگر محروم طبقات کی آواز کو بھی مؤثر انداز میں شامل کیا گیا ہے، قومی اسمبلی اور سینیٹ میں خواتین اور غیر مسلم شہریوں کیلئے مخصوص نشستیں اسی آئینی عزم کا مظہر ہیں، سینیٹ وفاقی اکائیوں کو مساوی نمائندگی دے کر پاکستان کے وفاقی کردار کو مزید مضبوط بناتا ہے۔
وزیراعظم نے کہا کہ شفافیت، عوامی رسائی اور جدید پارلیمانی طرزِ عمل، جمہوریت شفافیت، معلومات تک رسائی اور عوامی شمولیت کا تقاضا کرتی ہے، پاکستان کی پارلیمان نے قانون سازی، پارلیمانی مباحث، کمیٹی رپورٹس اور دیگر دستاویزات کو عوامی دسترس میں لا کر اس سمت میں اہم اقدامات کئے ہیں۔
ان کا مزید کہنا تھا کہ پاکستان کی پارلیمان بین الاقوامی پارلیمانی سفارت کاری میں بھی فعال کردار ادا کر رہی ہے، بین الپارلیمانی یونین، پارلیمانی فرینڈشپ گروپس اور دیگر بین الاقوامی فورمز میں شرکت کے ذریعے پاکستان عالمی امن، مکالمے، پائیدار ترقی، انسانی حقوق، صنفی مساوات اور بین الاقوامی تعاون کے فروغ کیلئے اپنا کردار ادا کر رہا ہے۔
