وزیراعظم شہباز شریف نے جنرل ہیڈ کوارٹرزکا دورہ کیا۔ جی ایچ کیو میں انہیں قومی سلامتی کے امور پر بریفنگ دی گئی۔ آئی ایس پی آر کے مطابق وزیر اعظم شہباز شریف نے کابینہ اراکین کے ہمراہ جی ایچ کیو کا دورہ کیا، اس موقع پر وزیراعظم کو گارڈ آف آنر پیش کیا گیا جبکہ آرمی چیف جنرل عاصم منیر نے وزیراعظم شہباز شریف کا خیرمقدم کیا۔
آئی ایس پی آر کے مطابق وزیراعظم شہباز شریف نے شہدا کی یادگار پر پھول رکھے اور شہدا کو خراج عقیدت پیش کیا۔ آئی ایس پی آر کا کہنا ہے کہ وزیراعظم اور کابینہ ارکان نے عسکری قیادت سے قومی سلامتی،علاقائی استحکام اور فوجی تیاریوں پر بات چیت کی۔
آئی ایس پی آر کے مطابق وزیراعظم اور کابینہ ارکان نے دہشت گردی کے خلاف جنگ میں پاک فوج کی پیشہ وارانہ مہارت کو سراہا جبکہ سویلین اور فوجی قیادت کا قومی مفادات کو برقرار رکھنے کیلئے مل کر کام کرنے کے عزم کا اعادہ کیا۔
اس موقع پر وزیراعظم نے کہا کہ حکومت مسلح افواج کی آپریشنل تیاریاں یقینی بنانے کیلئے تمام درکار وسائل دے گی،پاکستان کا پرامن عروج یقینی بنانے کیلئے مسلح افواج کے کردارکی اہمیت کو کم نہیں کیا جاسکتا۔
آئی ایس پی آر کے مطابق آرمی چیف جنرل عاصم منیر نے کہا کہ پاک فوج پاکستان کو درپیش سکیورٹی چیلنجز سے نمٹنے میں حکومت کی بھرپور حمایت کرے گی۔
