پی ایس ایل 10 کے 18 ویں میچ میں کوئٹہ گلیڈی ایٹرز نے ملتان سلطانز کے 90 رنز کا ہدف بغیر کسی نقصان کے ساتویں اوور میں پورا کرکے کامیابی حاصل کی ۔
لاہور کے قذافی سٹیڈیم میں کھیلے گئے میچ میں کوئٹہ گلیڈی ایٹرز نے ٹاس جیت کر فیلڈنگ کا فیصلہ کیا،ملتان سلطانز کی پوری ٹیم 17 اوور میں 89 رنز پرڈھیر ہوگئی ۔
ملتان سلطانز کے کپتان محمد رضوان 44 رنز کے ساتھ ناٹ آؤٹ رہے، ان کے علاوہ کوئی بھی بیٹر کوئٹہ کی بولنگ کا مقابلہ نہ کرسکا،ملتان سلطانز کے 9 کھلاڑی ڈبل فیگر میں بھی داخل نہ ہوسکے ۔
محمد رضوان پاکستان سپر لیگ میں بیٹ کیری کرنے والے پہلے کھلاڑی بن گئے ،کوئٹہ گلیڈی ایٹرز کی جانب سے خرم شہزاد نے چار کھلاڑیوں کو آؤٹ کیا، فہیم اشرف اور وسیم جونئیر نے دو، دو وکٹیں حاصل کیں ۔
کوئٹہ گلیڈی ایٹرز نے 90 رنز کا ہدف ساتویں اوور میں بغیر کسی نقصان کے حاصل کرکے کامیابی حاصل کی اور پوائنٹس ٹیبل پر دوسری پوزیشن پر آگئی ۔
کوئٹہ گلیڈی ایٹرز کے فن ایلن نے 45 اورکپتان سعود شکیل نے 42 رنز سکور کیے، شاندار باولنگ پر خرم شہزاد کو میچ کا بہترین کھلاڑی قرار دیا گیا ۔
