پاکستان اور جنوبی افریقہ کے درمیان راولپنڈی میں کھیلے جار ہے دوسرے ٹیسٹ میچ کے تیسرے روز کا کھیل ختم ہو گیا، قومی ٹیم نے دوسری اننگز میں 4 وکٹ پر 94 رنز بنا کر صرف 23 رنز کی برتری حاصل کرلی، تیسرے دن کا کھیل ختم ہونے تک قومی ٹیم کا ٹاپ آرڈر پھر ناکام ہوگیا اور ٹیم مشکلات سے دوچار ہو گئی ہے ، ابھی میچ کے چوتھے اور آخری دن کا کھیل اور جنوبی افریقہ کی دوسری اننگز باقی ہے ۔
راولپنڈی ٹیسٹ کے تیسرے روز پاکستان نے 71 رنز کے خسارے سے اپنی دوسری اننگز کا آغاز کیا تو صرف 16 کے مجموعی سکور پر ٹاپ تھری بیٹرز پویلین لوٹ گئے، آوٹ ہونے والوں میں امام الحق 9، عبداللہ شفیق 6 اور کپتان شان مسعود بغیر کوئی رن بنائے آؤٹ ہوئے ۔
ایسے میں بابر اعظم اور رضوان نے دن کے اختتامی اوورز میں ذمہ درانہ بیٹنگ کی اور تیسرے روز کھیل کے اختتام پر پاکستان نے 4 وکٹوں پر 94 رنز بنالیے اور اسے جنوبی افریقہ کے خلاف دوسری اننگز میں 23 رنز کی برتری حاصل ہو گئی، بابر اعظم 49 اور محمد رضوان 15 رنز کے ساتھ ناٹ آؤٹ ہیں ۔
اس سے قبل پہلی اننگز میں جنوبی افریقہ کی ٹیم کے آخری کھلاڑیوں نے شاندار بیٹنگ کا مظاہرہ کیا، مہمان ٹیم نے آخری 3 وکٹوں پر 194 رنز کا اضافہ کیا اور پاکستان پر 71 رنز کی برتری حاصل کی ۔
تیسرے روز جنوبی افریقہ نے پاکستان کے 333 رنز کے جواب میں اپنی پہلی نامکمل اننگز کا آغاز 185 رنز 4 کھلاڑی آؤٹ سے کیا تھا لیکن آصف آفریدی نے بغیر کسی رن کے اضافے کے ڈیولڈ بریوس کو پویلین بھیج دیا ۔
اس کے بعد آصف آفریدی نے کائل ویرینے اور سیٹ بیٹر ٹریسٹان اسٹبس کو بھی آؤٹ کر کے اپنے پہلے ہی ٹیسٹ کی پہلی اننگز میں 5 شکار مکمل کیے، مارکو جینسن کو نعمان علی نے ایل بی ڈبلیو کیا ۔
8 کھلاڑیوں کے جلد آؤٹ ہونے کے بعد سینورن متھوسوامے اور کیشو مہاراج نے شاندار بیٹنگ کی اور 71 رنز کی شراکت قائم کی جبکہ متھو سوامے نے کگیسو ربادا کے ساتھ ملکر بھی قیمتی 98 رنز کا اضافہ کیا اور ٹیم کا سکور 404 رنز تک پہنچایا ۔
کگیسو ربادا 4 چھکوں اور 4 چوکوں کی مدد سے 71 رنز بنا کر آصف آفریدی کا چھٹا شکار بنے جبکہ متھوسوامے 89 رنز بنا کر ناٹ آؤٹ رہے، پاکستان کی جانب سے آصف آفریدی نے ڈیبیو پر شاندار بولنگ کا مظاہرہ کرتے ہوئے 6 کھلاڑیوں کو آؤٹ کیا جبکہ دو وکٹیں نعمان علی کے حصے میں آئی اور ایک ایک کھلاڑی کو شاہین آفریدی اور ساجد خان نے آؤٹ کیا ۔
اس سے قبل میچ کے دوسرے روز پہلی اننگز میں 333 رنز سکور کیے تھے جس میں کپتان شان مسعود نے 87 رنز کی شاندار اننگز کھیلی تھی جبکہ سعود شکیل نے 66 اور عبداللہ شفیق نے 57 رنز کی اننگز کھیلی تھی۔ جنوبی افریقہ کی جانب سے کیشوو مہاراج نے 7 کھلاڑیوں کو آؤٹ کیا تھا ۔
