نائب وزیراعظم و وزیر خارجہ اسحٰق ڈار نے کہا ہے کہ پاکستان بھارت کے ساتھ مسئلہ کشمیر سمیت دیگر امور پر جامع مذاکرات کے لیے تیار ہے، پاک بھارت جنگ بندی پر عمل جاری ہے ۔
اسلام آباد: سینئر صحافیوں سے غیر رسمی گفتگو کرتے ہوئے نائب وزیراعظم اور وزیرخارجہ اسحٰق ڈار نے کہا جنگ بندی کے لیے انہیں امریکہ سے فون آیا تھا، جس پر انہوں نے واضح کیا تھا کہ پاکستان جنگ چاہتا ہی نہیں تھا، مارکو روبیو کا دورہ پاکستان ابھی شیڈول نہیں ہوا ۔
اسحٰق ڈار نے کہا کہ ہم نے کسی سے نہیں کہا تھا کہ ہمیں بھارت کے ساتھ بٹھائیں، ہم سے کسی نیوٹرل مقام پر بٹھانے کی بات کی گئی تھی، میں نے کہا تھا کہ اگر نیوٹرل مقام پر میٹنگ ہوگی تو کرلیں گے ۔
انہوں نے کہا کہ پاکستان نے واضح کیا تھا کہ بھارت کے ساتھ کسی ایک نکاتی ایجنڈے پر بات نہیں ہوگی، بھارت کے ساتھ مسئلہ کشمیر سمیت تمام تصفیہ طلب امور پر بات ہوگی ۔
نائب وزیر اعظم اور وزیر خارجہ نے کہا کہ بھارت کی جانب سے بلاوجہ بیان بازی جاری رہتی ہے ۔
اسحٰق ڈار نے قرار دیا کہ امریکی وزیر خارجہ کا دورہ پاکستان ابھی شیڈول نہیں ہے، کل میں بنگلہ دیش کے دو روزہ دورے پر جا رہا ہوں، دورے کا مقصد پاکستان اور بنگلہ دیش کو مزید قریب لانا ہے ۔
