خیبر پختونخوا کے جنوبی اضلاع میں بدامنی کے واقعات میں اضافہ دیکھا جا رہا ہے، جہاں بنوں میں پولیس اہلکاروں کی ٹارگٹ کلنگ کا سلسلہ جاری ہے۔
پولیس کے مطابق بنوں بکا خیل کے علاقے میں نامعلوم مسلح افراد نے فائرنگ کرکے پولیس اہلکار انور اللہ کو شہید کردیا۔ واقعے کے بعد پولیس نے علاقے کو گھیرے میں لے کر تحقیقات شروع کردی ہیں۔
پولیس حکام کے مطابق گزشتہ تین روز کے دوران بنوں میں ٹارگٹ کلنگ کے مختلف واقعات میں تین پولیس اہلکار شہید جبکہ ایک اہلکار زخمی ہوا ہے۔
خیبر پختونخوا کے جنوبی اضلاع دہشت گردی سے شدید متاثر ہیں، تاہم بنوں میں پولیس اہلکاروں کو مسلسل نشانہ بنائے جانے کے واقعات نے سیکیورٹی صورتحال پر تشویش میں اضافہ کردیا ہے۔
پولیس کا کہنا ہے کہ تازہ واقعے میں ملوث ملزمان کی گرفتاری کے لیے تحقیقات اور تلاش کا عمل جاری ہے۔
