پاکستان کیلئے ایک اور اعزاز سامنے آیا ہے جہاں دخترِ وطن ثروت فاطمہ نے عالمی سطح پر ملک کا نام روشن کر دیا۔ پاکستانی کھلاڑی نے ملائیشیا میں منعقدہ بیڈمنٹن مقابلوں میں شاندار کارکردگی دکھاتے ہوئے دو گولڈ میڈلز اپنے نام کیے اور نیا ریکارڈ قائم کیا۔
بلوچستان سے تعلق رکھنے والی ثروت فاطمہ نے اپنی کامیابی کے ذریعے ثابت کیا کہ اگر حوصلے بلند ہوں تو منزل خود قدم چومتی ہے۔ ان کی یہ کامیابی نہ صرف ان کی محنت اور لگن کا نتیجہ ہے بلکہ ملک کی نمائندگی کا بھی ایک شاندار مظہر ہے۔
اس موقع پر عالمی گولڈ میڈلسٹ ثروت فاطمہ نے کہا کہ یہ کامیابی صرف ایک جیت نہیں بلکہ ان کی انتھک محنت، کھیل سے سچی محبت اور مسلسل جدوجہد کا نتیجہ ہے۔ انہوں نے اپنے گولڈ میڈلز کو اپنے والد اور پاک فوج کی حوصلہ افزائی کا ثمر قرار دیا۔
ثروت فاطمہ نے کہا کہ انہیں ہمیشہ اپنے والد اور پاک فوج کی مکمل سپورٹ حاصل رہی، جس نے انہیں آگے بڑھنے کا حوصلہ دیا۔ انہوں نے پاک فوج میں شمولیت کی خواہش کا بھی اظہار کرتے ہوئے کہا کہ وہ پاک فوج کا حصہ بن کر مزید ملک کا نام روشن کرنا چاہتی ہیں۔
انہوں نے مزید کہا کہ پاک فوج ملک کے دور دراز علاقوں سے ٹیلنٹ کو تلاش کر کے اسے عالمی سطح تک پہنچانے میں اہم کردار ادا کر رہی ہے۔
