پشاور (حسن علی شاہ) — پاک افغان طورخم بارڈر جو دونوں ممالک کے درمیان کشیدگی کے باعث ڈیڑھ ماہ قبل مکمل طور پر بند کر دیا گیا تھا، بروز جمعہ جزوی طور پر کھول دیا گیا۔ بارڈر کو صرف ان افغان شہریوں کی واپسی کے لیے کھولا گیا جو پشاور کے مختلف تھانوں اور سنٹرل جیل میں زیر حراست تھے۔
جمعہ کے روز مذکورہ افغان مہاجرین کے علاوہ پشاور کے مختلف علاقوں جیسے سربند، ریگی، تاج آباد، تہکال، زنگلی، چمکنی، بڈھ بیر، سوڑیزی اور انقلاب روڈ سکیم چوک سے درجنوں افغان خاندانوں کی واپسی کا عمل بھی دیکھا گیا۔
اس موقع پر متعلقہ حکام اور قانون نافذ کرنے والے اداروں کے اہلکار بھی موجود تھے تاکہ واپسی کے عمل کو منظم اور پرامن طریقے سے مکمل کیا جا سکے۔
