آج 27 فروری کو آپریشن سوئفٹ ریٹارٹ کے سات سال مکمل ہو گئے۔ سن 2019 میں اسی روز پاکستان نے بھارت کی جارحیت کا منہ توڑ جواب دیا تھا اور اپنی دفاعی صلاحیتوں کا عملی مظاہرہ کیا تھا۔
پاک فوج کے شعبہ تعلقاتِ عامہ آئی ایس پی آر کی جانب سے جاری بیان کے مطابق اس موقع پر مسلح افواج کی اعلیٰ قیادت نے مشترکہ پیغام جاری کیا۔ بیان میں بتایا گیا کہ چیئرمین جوائنٹ چیفس آف اسٹاف کمیٹی اور آرمی چیف فیلڈ مارشل عاصم منير پاک بحریہ اور پاک فضائیہ کے سربراہان نے اس عزم کا اعادہ کیا کہ قومی سلامتی اور علاقائی امن کے تحفظ کے لیے پاکستان کا عزم غیر متزلزل ہے۔
آئی ایس پی آر کے مطابق 27 فروری 2019 کو پاکستان نے بھارتی جارحیت کا بھرپور اور مؤثر جواب دیا تھا۔ کارروائی کے دوران پاک فضائیہ نے بھارتی جنگی طیارہ مار گرایا اور بھارتی پائلٹ ونگ کمانڈر ابھی نندن کو گرفتار کیا، جسے بعد ازاں خیرسگالی کے جذبے کے تحت رہا کر دیا گیا۔
بیان میں کہا گیا کہ آپریشن سوئفٹ ریٹارٹ کے دوران پاکستان کی پیشہ ورانہ مہارت اور دفاعی برتری دنیا پر واضح ہوئی اور خطے میں اسٹریٹیجک توازن بحال ہوا۔ مسلح افواج ہر قسم کے خطرے کا مقابلہ کرنے کے لیے مکمل طور پر تیار ہیں اور وطنِ عزیز کے دفاع میں کسی قربانی سے دریغ نہیں کریں گی۔
اعلیٰ عسکری قیادت نے اس عزم کا بھی اظہار کیا کہ پاکستان خطے میں پائیدار امن کا خواہاں ہے، تاہم کسی بھی جارحیت کا فوری اور مؤثر جواب دیا جائے گا۔
