اسلام آباد: وفاقی وزیر آئی ٹی شزہ فاطمہ خواجہ نے کہا ہے کہ بچوں کو سائبر خطرات اور انٹرنیٹ کے مضر اثرات سے محفوظ بنانے کے لیے عالمی سطح پر قوانین بنانے کی ضرورت ہے۔
اسلام آباد میں ’’(SAFE SCROLL) نیشنل پالیسی ڈائیلاگ‘‘ سے خطاب کرتے ہوئے وفاقی وزیر نے کہا کہ دنیا بھر میں بچوں کا آئی ٹی کے شعبے سے لگاؤ مسلسل بڑھ رہا ہے اور کم عمر بچے بھی اس شعبے میں بڑے بڑے کارنامے سرانجام دے رہے ہیں۔
شزہ فاطمہ نے کہا کہ سائبر خطرات سے نمٹنے کے لیے قانون سازی کے ساتھ ساتھ اپنے ماحول کو بھی بہتر بنانا ہوگا۔
حکومت ملک میں سائبر مسائل کے حل کے لیے سنجیدگی سے کام کر رہی ہے۔
پاکستان ٹیلی کمیونیکیشن اتھارٹی اور دیگر حکومتی ادارے سائبر آگاہی اور تعلیم کے فروغ کے لیے اقدامات کر رہے ہیں۔
انہوں نے مزید کہا کہ والدین اور معاشرے کو بچوں میں ذمہ داری کا احساس پیدا کرنا ہوگا تاکہ وہ ڈیجیٹل دنیا کے مواقع سے فائدہ اٹھاتے ہوئے سائبر خطرات سے بھی محفوظ رہ سکیں۔
