راولپنڈی ٹیسٹ میں جنوبی افریقہ نے باآسانی پاکستانی ٹیم کو 8 وکٹوں سے شکست دے کر دو میچز کی سیریز ایک ایک سے برابر کردی، پاکستان کا 68 رنز کا ہدف مہمان ٹیم نے 2 وکٹوں کے نقصان پر حاصل کرکے کامیابی حاصل کی ۔
راولپنڈی میں کھیلے گئے دوسرے ٹیسٹ میچ کے چوتھے دن کے آغاز سے ہی قومی ٹیم مشکلات میں گھری رہی اور پہلے سیشن میں ہی ایک کے بعد ایک وکٹ گرنا شروع ہوگئی ۔
کھیل کے چوتھے روز سب سے پہلے پاکستان کے بابراعظم 50 رنز پر کر آوٹ ہوئے جس کے بعد تھوڑی ہی دیر میں دیگر بیٹرز بھی پویلین لوٹ گئے ۔
محمد رضوان 18، سلمان علی آغا 28 اور ساجد خان نے 13 رنز بنائے جب کہ نعمان علی اور شاہین آفریدی صفر پر آؤٹ ہوئے، آصف آفریدی صفر کے ساتھ ناٹ آؤٹ رہے ۔
پاکستانی ٹیم اپنی دوسری اننگز میں 138 رنز پر آوٹ ہوئی اور یوں جنوبی افریقہ کو جیت کے لیے 68 رنز کا ہدف ملا، جسے مہمان ٹیم نے 2 وکٹوں کے قنصان پر پورا کرکے کامیابی حاصل کی اور سیریز بھی ایک ایک سے برابر کردی ۔
جنوبی افریقہ کی جانب سے سیمن ہارمر نے 6 وکٹیں حاصل کیں جب کہ کیشو مہاراج نے 2 اور کگیسو ربادا نے ایک وکٹ اپنے نام کی ۔
جنوبی افریقہ کی جانب سے دوسری اننگز میں ایڈم مارکرم 42 رنز جب کہ ٹرسٹن اسٹبز بغیر کوئی رن بنائے آؤٹ ہوئے، ریان ریکلٹن 25 رنز بناکر ناٹ آؤٹ رہے ۔
پاکستان اور جنوبی افریقہ کے درمیان 2 ٹیسٹ پر مشتمل سیریز 1-1 سے برابر ہوگئی، لاہور میں پہلے ٹیسٹ میچ میں پاکستان نے مہمان ٹیم کو شکست دی تھی ۔
جنوبی افریقہ کے کیشو مہاراج کو مین آف دی میچ اور موتو سامی کو پلئیر آف دی سیریز کا اعزاز دیا گیا ۔
یاد رہے کہ پاکستان نے پہلی اننگز میں 333 بنائے تھے جس کے جواب میں مہمان ٹیم نے 404 رنز بنائے تھے، یوں مہمان ٹیم نے پہلی اننگز میں 71 رنز کی برتری حاصل کی تھی ۔
